Туннэ Кузебай Герд нимо гимназиысь дышетскисьёс трос йӧскалыкъем Удмуртилэн лулчеберетаз «муромизы». «Мы – россияне!» нимо форум-шудонын соос элькунын улӥсь 8 пӧртэм калыкъёслы сӥзем станциосы вуылӥзы.

«Родина – значит вместе!» шудон огъетлэн люкетэныз тодматскизы, Александр Сергеевич Пушкинлэсь гожтосъёссэ тодазы ваизы, нимысьтыз ватсэт пыр «выйизы» ӟуч лулчеберетлэн, пор крезьгур инструментъёслэн, бесерман дӥсьлэн но бигер сиён-юонлэн дуннеязы.

Озьы ик нылпиос дышетскизы йӧскалык эктонъёслы, удмурт но бигер кылъёсты тодазы ваизы, эшшо асфальт вылэ яратоно кунмылы сӥзьыса суредъёс кельтӥзы.
Котькуд станциез ортчыса пиналъёс гожпусъёс бичазы, кудъёсызлэсь берло соос «Россияне» кыл пӧрмытӥзы.