Фестивальын Удмурт Элькунлэсь данзэ Софья Владимирова, Ксения Усманова но Анастасия Фомина утизы.

Егит гожъяськисьёс кылбурет но проза удысъёсъя мастер-классъёсы, кутскись гожъяськисьёс понна чеберлыко берыктонлы сӥзем семинаръёсы пыриськизы.

Анастасия Фоминалэн верамезья, та ужрадэ Москваысь но мукет улосвылъёсысь спикеръёс вуэмын вал, кудъёсынызы ӵош лыктэм усточиос литературалы сӥзем юанъёсты сэрттӥзы-пертчизы. Со вера: «Тодматскимы тунсыко спикеръёсын, соос пӧлын – пор кылбурчи, кылысь кылэ берыктӥсь, Россиысь писательёслэн огазеяськонзылэн ёзчиез Альбертина Иванова, «Ассоциация финно-угорских народов Российской Федерации» Россииякуспо мерлык движенилэн кивалтӥсез Пётр Тултаев но кылысь кылэ берыктӥсь, критик, М. Горький нимо литературной институтлэн доцентэз, кылосбур тодосъёсъя кандидат Вера Пантелеева. Котькуд вераськись-спикер лэчыт ужпумъёсты ӝутӥз, трос саклык висъямын вал туала литературалы. Та ужрад туж кельшиз. Трос выльзэ но пайдаёзэ басьтӥмы та фестивальын. Оскисько, азьланяз со гожъяськон удысын быгатонлыкъёсмес юнматыны юрттоз шуыса».

Оглом Фестивале 100-лэсь трос адями пыриськиз, соос РФ-лэн 15 улосвылъёсысьтыз финн-угор но самоди калыкъёслэн усточиоссы луо, творческой ужъёссэс анай кылынызы гожъяло но асьсэос ик ӟуч кылэ берыкто.

Фестивальлы йылпумъянъёс лэсьтӥз Пётр Тултаев, «Ассоциация финно-угорских народов Российской Федерации» Россиякуспо мерлык движенилэн кивалтӥсез, Россия Федерациысь сенатор. Со пусйиз, йӧскалык литературалэн ӵуказе нуналэз вань шуыса, малы ке шуоно, егит талантъёс пӧртэм кылъёсты тодыны тыршо но асьсэды проза, кылбурет но драма удысъёсын быгатыса возьмато.