6–10-тӥ куартолэзе «Ёлочка» лагерьын «Ӟуч вашкала сям-йылолъёс» («Традиции русской старины») нимо смена ужзэ азьланьтӥз. Отчы пыриськизы «Общество русской культуры Удмуртской Республики» но мукет йӧскалык-лулчеберетъя огазеяськонъёсысь ёзчиос, Ижкарысь, элькунысьтымы мукет кар но ёрос дышетон ужъюртъёсысь дышетскисьёс.

Котькуд нунал смена куинь блокъёсъя ужзэ азьланьтӥз: дышетскон, азинскон но творчество. Ваньзы соос лекциосын, тунсыко адямиосын пумиськонъёсын, спорт но йӧскалык шудонъёсын, творческой площадкаосын, вожвылъяськонъёсын пачылмытэмын вал. Вить нунал ӵоже пиналъёс славян но ӟуч калыклэн лулчеберетэныз, сям-йылолъёсыныз, кылэныз, шудонъёсыныз тодматскизы.

Со сяна, пыриськисьёс ӧнерчиослэсь тунсыко лекциоссэс кылзӥзы, киужъёсъя мастер-классъёсын ужазы, ӧнеръёсын тодмасткизы, визьбур шудонъёсын йырзэс сыназы. Табере пиналъёс ваньзы ӵош быдэс Россиысь кунмуртлыко идентичностез юнматонлы сӥзем ӵектосъёс, акциос, ужрадъёс малпаны но соосты улонэ пыӵатыны быгатозы.

Ужрадлэн валтӥсь азьмугез – Удмурт Элькунын Россия Федерациысь кун йӧскалык политикаез, Удмурт Элькунысь «Этносоциальное развитие и гармонизация межэтнических отношений» кун программаез улонэ пыӵатон, элькунысь калыкъёслэсь кылъёссэс, лулчеберетсэс утёнлы, дышетонлы но азинтонлы сӥзем куронъёсты выльдон, шаерамы калыкъёс вискын эшлыко кусыпъёсты возён.

Элькунысь Тӧролэн Александр Бречаловлэн кичӧлтэмезъя, таиз ар егитъёслэн арзы шуыса пусйиське. Та ужрад озьы ик калыкъёслэсь сям-йылолъёссэс, аспӧртэмлыксэс утёнлы но азинтонлы ӧръямын. Со быдэсак тупа «Культура» нацпроектлэн куронъёсызлы, кудӥзлы кутскон сётӥз Россилэн Президентэз Владимир Путин.