12-тӥ но 13-тӥ инвожое Ижкарын Михаило-Архангельской кафедрал черкын Инмар Анайлэн Казанской обросэз пуктэмын луоз – со 1612-тӥ аре Москваез но быдэс Россиез полякъёслэн но литовецъёслэн киултэмысьтызы эрике поттэм Кузьма Мининэн но Дмитрий Пожарскиен кылдытэм нижегородской ополченилэн святыняез.

Обросэн сӥё-дано пумиськон 12-тӥ инвожое 9:30 часын черкын ортчоз. Собере вӧсяськисьёс мудорез чупаны быгатозы 12-тӥ инвожое 20:00 часозь но 13-тӥ инвожое 7:00 часысен 19:00-озь.

XVI даурысь оброслэн Ижкаре вуэмез тупа Москваын 6-тӥ куартолэзе огъяросси киросэн ветлон ужрад ортчытонэ. Кирослэн сюрес вылаз Россиысь 50-лэсь уно каръёс пумисько.

Инмар Анайлэн Казанской обросэз – Россилэн ӟуч вормонъёсызлэн мудорез. Искусствоведъёс лыдъяло, та святыняез 1580-тӥ аръёсы гожтӥзы шуыса. Смута дыръя Казанской мудор Мининэн но Пожарскиен кылдытэм ополчениын полклэн святыняез луиз, 1611-тӥ арын сое нуизы поляк но литва интервентъёсын басьтэм Москвае. Та мудор юрттэмен, ӟуч ожгарчиослэн куинь нунал вӧсяськемзы но кӧс воземзы бере, 1612-тӥ арын сӥзьыл Инмар Анай Москваез тушмонъёслэсь мозмытыны быгатӥз.

Шоркарез мозмытэм бере Дмитрий Пожарский обросэз Лубянкаысь аслаз Введенской черказ интыяз, нош собере святыняез нимысьтыз пуктэм Казанской соборе нуизы. 1812-тӥ аре француз тушмонъёс дуно окладзэ киултӥзы, но ассэ мудорез утьыны удалтӥз. Россилэн 1812-тӥ аре Атыкай ожгарын вормемез но 1814-тӥ аре Парижез сӥё-дано ожмаса басьтэмез озьы ик Казанской оброс азьын вӧсяськонэн герӟаськемын.

Революци дыръя 1918-тӥ аре оброс Казанской черкысь лушкаса нуэмын вал, собере 105 ар ортчыса гинэ паймымон амалэн шедьтэмын – Святейший Кирилл Патриарх тыршемен. Мудорез Переделкино резиденциысьтыз складаз шедьтӥзы. Экспертиза зэм луэмзэ юнматӥз. Святыняез Казанской соборе берыктӥзы 4-тӥ шуркынмонэ 2023-тӥ аре Москваын Горд площадьын – Инмар Анайлэн Казанской обросэзлэн праздниказ но Калыкъёслэн огазеяськон нуналазы.