1-тӥ шуркынмонэ, Калыкъёслэн огазеяськон нуналзы но Удмуртилэн кунлык басьтэм нуналзы азьын, быдэс Россиын дасэтӥез «Бадӟым этнографической диктант» (0+) акция кутскиз.

«Калыкъёсмы трос, нош кунмы одӥг!» таӵе лозунген дасэтӥез югдытон калыккуспо акция 8-тӥ шуркынмонозь кыстӥськоз офлайн- но онлайн-амалъёсын — https://miretno.ru/ вотэсбамын.

Ӵектос Россиысь котькуд калыклэсь сям-йылолъёссэ, лулчеберетсэ, историзэ утьыны но вӧлмытыны, семья дунлыкъёсты юнматыны юрттэ. Со «Семья» йӧскалык ӵектослэн, кудзэ Владимир Путин юнматӥз, ужпумъёсызлы тупа.

Туэ Удмуртиын диктантэз 214 площадкаын гожтыны луонлык вань. Валтӥсез соос пӧлысь — УЭ-ысь Йӧскалык лыдӟетъюрт. Отын ӵектослэн сӥё-дано усьтонэз ортчиз, куноос пӧлын тӧрлык ёзэсъёслэн, йӧскалык-лулчеберетъя огазеяськонъёслэн огмуртъёссы, студентъёс но мыло-кыдо улосчиос.

Ужрадэ 70-лэсь трос адями пыриськиз. Соос пӧлын Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев. Со вань люкаськемъёсты ӟечкылаз но акцилы старт сётӥз.

Тодэ вайытом, диктант Россиысь котькуд улосвылын ортчытӥське. Отын 20 юанъёс 16 аресозь егитъёслы но 30 – 16 ареслэсь бадӟымъёслы. Оглом 100 балл люканы луэ. Ужез быдэстыны 45 минут сётӥське. Пыриськисьёслы йылпумъянъёсын сертификатъёс соку ик сётъязы. Ужрад Атыкай музъемез утисьлэн араз ортчытӥське, диктантын нырысетӥяз нимысьтыз ожгар операцие пыриськисьёс видео амал пыр юанъёссэс сётъязы.

Ужрад 8-тӥ шуркынмонозь кыстӥськоз. Йылпумъянъёс 12-тӥ толсуре лэсьтэмын луозы, Россия Федерацилэн Кункатэзлэн нуналаз. Онлайн амалэн тестэз Бадӟым этнографической диктантлэн https://miretno.ru/ нимлыко вотэсбамаз но ортчыны луэ. Отын ик пыриськисьёс юанъёслэсь шонер валэктонзэ соку ик тодыны быгато, исторической справкаос сётэмын луозы ошмессинъёс вылэ ссылкаосын. Йылпумъянэн сертификатэз 10-тӥ шуркынмон бере басьтыны луоз.

Эшшо огпол пусъём, ӵектос Удмуртиын кылдытэмын – «Удмуртиысь калыкъёслэн ассамблеязы» («Ассамблея народов Удмуртии») мерлыко огазеяськон но УЭ-ысь Йӧскалык политикая министерство кичӧлтэм улсын. Собере акция, Россие сяна, кунсьӧре но паськыт вӧлмиз. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ.