Котькуд ар ортчись «Бадӟым Удмурт Диктант» акция 1-тӥ оштолэзе очной но заочной амалъёсын радъяськоз. Элькунысь Тӧролэн Александр Бречаловлэн кичӧлтэмезъя, таиз ар егитъёслэн арзы шуыса пусйиське. Та ужрад озьы ик герӟаськемын на Кузебай Гердлы но Ашальчи Окилы 125 ар тырмонэн.

Акцие вань мылкыд карисьёс нимысьтыз площадкае лыктыса яке телевизор, радио пыр кылзыса (13.00 часын Ижкарлэн дырызъя) пыриськыны быгато. Валтӥсь площадка луоз Удмурт кун университет, со сяна ужэз радъялозы Кузебай Герд нимо гимназия, карысь лыдӟетъюртъёс. Быдэсак лыдметэн тодматскыны быгатӥськоды УЭ-ысь йӧскалык политикая министрестволэн нимысьтыз вотэсбамаз https://minnac.ru/spisok-ochnyh-ploshhadok-bolshogo-udmurtskogo-diktanta-2023/

Радъясьлэн Наталья Михайловналэн верамезъя, Удмуртиысь, Татарстанысь, Башкириысь, Пермь улосвылысь но Москваысь кураторъёслэсь площадкаоссэс радъянъя ог 100 вазиськон (заявка) вуиз.

Туэ диктантлы текст дасяз журналист но прозаик Мария Векшина. Солэн верамезъя, гожтоно уж пусъёсты пуктылонэн узырмемын – пыриськисьёс понна таиз тужгес но секытэз луоз.

«Бадӟым Удмурт Диктантлы текст гожтон – секыт но сюлмаськытӥсь уж. Акцилэн кулэлыкез озьы ик герӟаськемын Кузебай Гердлэсь но Ашальчи Окилэсь котырес лыдпусъёссэс пусъёнэн», – вераз Мария Векшина.

Ватсаса быгатӥськоды на онлайн-тестирование ортчыны, кудӥз удмурт кылбурчиослы сӥземын. Отчы ог 200 адями пыриськиз ни. Тодон-валанъёстэс эскерыны быгатӥськоды та ссылкая: https://www.udmdiktant.ru/test

Удмурт Элькунын но солэн сьӧраз диктант 2012-тӥ арысен радъяське. Котькуд ар акция лыдэ басьтэ элькун но удмурт калык понна кулэлыко югдуръёсты. Нош текст гожтыны мылкыд каро шаерысьтымы пӧртэм гожъяськисьёс. Кылем арын диктантэ 3 сюрс адями пыриськиз. Соос пӧлысь тужгес но егитъёсыз вал Ижкарысь, Башкортостанысь но Татарстанысь 7 аресъем улосчиос. Балезино ёросысь 85 аресъем кышномурт тужгес но арлыдоез луиз.

Пыр-почгес ӵектослэн вотэсбамаз: https://www.udmdiktant.ru