12-тӥ южтолэзе 2026-тӥ аре Калыкъёслэн эшъяськон юртазы Удмурт Элькунысь Йӧскалык политикая министерстволэн кенешонэз ортчиз. Ужрадэ пыриськизы Удмурт Элькунысь быдэсъясь ёзэтъёсысь но аскивалтэт ёзэтъёсысь огмуртъёс, йӧскалык-лулчеберетъя мерлык огазеяськонъёслэн председательёссы но конфессиослэн азьветлӥсьёссы.

Кенешон огкылысь улонлы, йӧскалык кусыпъёсты умоятонлы сӥземын вал. Солэн ужпумъёсыз кунмылэн Владимир Путин азьмуртэнымы юнматэм «Семья» йӧскалык ӵектосъёсызлы тупало.

Кенешонэ люкаськемъёсты Удмурт Элькунысь Тӧролэн но Кивалтэтлэн Администрацизылэн кивалтӥсез Александр Журавлев пумитаз: «Асьме тушмонъёсмы трос йӧскалык но вӧсьбур луэммес ужазы кутыны тыршо, умойтэм уж малпаны. Но, зэмзэ вераса – со милям азьбурмы. Удмуртия кема дырысен – калыкъёслэн ог-огенызы тупаса улонлэн адӟытонэз. Элькунын 130-лэсь трос калык ог-огенызы валче улэ, лулчеберетсэс утьыса но ог-огзэс гажаса. Лыдпусъёс юнмато гинэ та веранэз: 85% Удмуртиын улӥсьёс калык кусыпъёсты умоен лыдъяло. Та Россиысь калыкъёслэн огъя луэмзылэн арез – калыкъёс куспын эшъяськон сяна, огазеяськон но: спортын, лулчеберетын, кема витем Вормонын. Россия – асьме юртмы, ӵошен гинэ асьмеос сое кужмогес карыны быгатомы».

Министерстволэсь ужъемышъёссэ, азьмугъёссэ аслаз докладаз йӧскалык политикая министр Эдуард Петров вераз паськытатэм коллегилэн кенешоназ. Бадӟым саклык висъямын Россиысь калыкъёслэн огъя луэмзылэн арезлы, кудзэ кунмылэн Азьмуртэз юнматӥз.

Ужрадын асьсэ докладъёссэс пӧртэм ӧнерчиос мыло-кыдо лыдӟизы куноослы. Ивортӥсьёс пӧлын УЭ-лэн Кивалтэтысь Председательлэн воштӥсез, Ӟуч лулчеберетъя огазеяськонлэн кивалтӥсез (2026-тӥ арысен) Наталья Тойкина, УЭ-ысь Егитъёсын ужан политикая министр Максим Файзулин, Дэри ёросысь Тӧролэн воштӥсез Гульнара Шнейдер, Калыкъёслэн Эшъяськон юртсылэн кивалтӥсезлэн воштӥсез Алина Жуйкова, Ижкарысь но Удмурт Элькунысь Епархилэн секретарез Илья Медведев, Удмуртилэн муфтиез, РДУМ-лэн кивалтӥсез Фаиз-хазрат Мухамедшин.

Ужрадлэн йылпумъяназ сӥё-дано данъетан ортчиз. Этнокультура но югдытон удысын ӵектосъёсты улонэ вӧлмытӥсь мыло-кыдо азьветлӥсьёсты пусйизы.

Кенешонлэн йылпумъянъёсыз Удмуртилэн улосвыл йӧскалык политикалэн ӧръёсызлы 2026-тӥ ар понна инъет луизы.