17-тӥ инвожое Можга ёросысь Пичи Сюга гуртын «Гербер» элькун шулдыръяськон ортчиз. Тулыс ужъёслэсь йылпумъяськемзэс пусйыны, дышем сямен, вуизы элькунмылэн вань ёросъёсысьтыз но мукет улосъёсын улӥсь удмуртъёслэн делегациоссы. Радъясьёслэн ивортэмзыя, огъя 8 сюрслэсь уно адями вуылӥз празднике.

Куноос понна ужазы 15 площадкаос. Со «Усточикар» — кибашлыослэн карзы, «Шудон азбар» — нылпиослы шудон инты. «Кунокуа» — куноослы азбаръёс, «Батыр шудонъёс» — йӧскалык спорт амалъёсъя ӵошатсконъёс, «Андан валъёс» — гурт техникаен выставка, «Азвесь геры» – музъем гырисьёслэн ӵошатсконзы, «Мудорын» ортчиз ӝукез вӧсян вашкала йылол.

Туэ шулдыръяськонлэн валтӥсь темаез герӟаськемын вал валлэн образэныз. Ӵапак Можга ёросын будэто тодмо Ватка валъёсты, кудъёсыз Горд книгае пыртэмын. Шулдыръяськонэ лыктэмъёслэн луонлыксы вал учкыны та чебер валъёсыз, ворттылыны соос вылын.

Люкаськем калыкез Удмуртилэн Тӧроезлэсь ужзэ огдырлы быдэсъясьлэн Александр Бречаловлэн нимыныз праздникен ӟечкылаз элькун Тӧролэн но Кивалтэтлэн администрацизылэн кивалтӥсезлэсь ужзэ быдэсъясь Сергей Смирнов. Вазиськоназ Сергей Смирнов пусйиз, «Гербер» кемалась ни калыккуспо шулдыръяськон луэмын шуыса. Тау кариз радъясьёсылы таӵе шулдыръяськонэз пӧрмытэмзы понна. А.В. Бречаловлэн косэмезъя, Уча черкогуртысь нылпи эктонъя «Топотушки» коллективлы Сергей Смирнов нимысьтыз кузьым сётӥз – Москвае мыныны сертификат.

Элькун кивалтэтлэн тӧроезлэсь ужзэ быдэсъясь Виктор Савельев нимысьтыз тау кариз гурт возёсын ужасьёслы: «Туэ лыдпусъёс возьмато – музъем тросгес киземын, йӧл но тросгес кыскемын шуыса. Со ваньмыз тӥляд тыршеменыды!».

Можга ёрослэн Тӧроез Аркадий Вершинин тодэ ваиз Можга ёросын 25 ар талэсь азьло ортчем «Герберез», соку туж зол зориз. Таяз арекалыклы шулдыръяськыны куазь ӧз люкеты.

Калыкез озьы ик ӟечкылазы Кун Кенешлэн тӧроез Владимир Невоструев, Удмурт Элькунысь йӧскалык политикая министр Лариса Буранова, вань удмуртъёслэн «Удмурт Кенеш» ассоциацизылэн кивалтӥсез Татьяна Ишматова.

Сцена вылын озьы ик ортчиз «Герберлэсь» пуссэ мукет ёросэ сётон йылол. Озьыен, вуоно арын Уваын шулдыръяськоме.