«Нечкино» курорт огъетын православной шулдыръяськонъёс радъяськизы. Татын ньыль нунал куспын православной улоскуспо «Реки воды живой»  семья но егитъёслэн фестивальзы ортчиз. Форуме 250 пала адями люкаськиз. Ужрадэз яркыт йылпумъяз Русьлэн Крещение нуналэз.

Праздник нунал вӧсяськонысен кутскиз. Служба бере Митрополит Викторин, Сарапул ёрослэн тӧроез Айдар Шарафутдинов ваньзэсты ӟечкылазы.

Куноосты озьы ик УЭ-ысь Йӧскалык политикая министр Эдуард Петров но ӟечкылаз.

Куноос концертэз адӟон сяна, спортъя шудонъёсы но пыриськиз: ӝӧквыл теннис, мини-футбол но волейбол. Мылкыд кариськёс парке ветлӥзы, канат сюрестӥ ортчизы, тымет дурын чорыгазы.

Туннэ Сигаево черкогуртын Удмуртиысь одӥг гинэ луись святой князь Владимирлы сӥзем черкез вӧсялозы.

Ижкар но Удмурт епархилэн ивортодэтэзъя.