22-тӥ гудырикошконэ «Тулкым» кылчиослэн лагерьзы йылпумъяськиз. Отчы вуылӥзы Калыкъёслэн Эшъяськон юртысьтызы ужасьёс: информационно-аналитической ёзэтлэн кивалтӥсез Мария Уткина но контент-редактор Богдан Анфиногенов. Соос удмурт егитъёслэн кичӧлтонъёссы но Калыкъёслэн Эшъяськон юртсылэн ӵектосъёсыз сярысь мадизы. Озьы ик, пиналъёсын ӵош удмурт кылын нырысетӥ «Даур ТВ» интернет-телеканаллы репортаж лэсьтӥзы.

Со нуналэ ик «Оранжевое настроение» лагерьын «Шундыкар» сменалэн сиё-дано усьтӥськонэз ортчиз.

Пиналъёсты ӟечкыланы вуылӥзы «Удмурт Кенеш» огазеяськонлэн Тӧроез, Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Ураськин, Туризмъя но шутэтсконъя элькун центрлэн валтӥсь директорез Ксения Майер, Егитъёслэн парламентсылэн ёзчиез Марина Субботина, «Шунды» дэменлыклэн азьвыл тӧроосыз но эшъёсыз. Шуныт кылъёс вераз Удмурт Элькунысь йӧскалык политикая министр Эдуард Петров: «Та лагерь зэмос кебит – кузница луэ, кудӥз удмурт кадръёсты дася. Макем трос тодмо луэм адямиос вуылӥзы та лагере, нош табере тыршо удмурт лулчеберетэз азинтон но вӧлмытон удысын. «Шундыкар» лагерь пыр потэм егитъёс мыло-кыдо пырисько мерлыко огазеяськонъёслэн ужазы, кылсярысь, «Удмурт кенеш», «Шунды», «Куара», «Артэ» но мукетъёсаз. Оскисько, лагерь пыр ортчем пиналъёс одно ик асьсэлэсь удыссэс шедьтозы но зэмос усточиос (мастеръёс) луозы. Нош ми одно ик тыршом юрттыны соослы».

Укмыс нунал ӵоже пиналъёс журналистика, литература, театр, киужъёсъя декоративно-прикладной устолык, видеоисскуство но мукет ӧръёсъя асьсэлэсь быгатонлыкъёссэс муромытозы но азинтозы. Творческой мастерскойёс, интеллектуал но спорт шудонъёс, куноосын пумиськонъёс удмурт кылын радъяськозы. Сменалэн валтӥсь ужпумез – пиналъёсты удмурт лулчеберетэн тодматон. Лагере вуылозы удмурт активистъёс: Алина Антонова, Альбина Беспалова, Влад Андреев. Драмтеатрысь актёръёс мастер-классъёс ортчытозы. «Айкай» театр кырӟанъёсын, эктонъёсын, шудонъёсын шулдыртоз. Лудорвай музейысь ужасьёс удмурт сюан ортчытонэз возьматозы.

«Шундыкарлэн куамын одӥгетӥ сменаез сӥземын луоз Шунды Бичетлы», – вераз Виолетта Анисисмова, егитъёслэн «Шунды» огазеяськонзылэн Тӧроез. – Ми малпамы сыӵе история: кыӵе ке прозаик кылдытӥз дас одӥг книга. Соос пӧлысь одӥгез гинэ утиськиз, мукетъёсыз ышизы-быризы. Смена ӵоже пиналъёс ышем книгаосты «бичалозы».

Туэ лагере сю пинал ӧтемын, соос пӧлын, Удмуртиысь сяна, Татарстанысь но Башкортостанысь нылпиос вуэмын. Ужез радъясьёс оско, вуоно аре сменае эшшо но тросгес пиналъёс пыриськозы шуыса, Пермь но Киров улосвылъёсты лыдэ басьтыса.