22-тӥ гудырикошконэ «Оранжевое настроение» лагерьын «Шундыкар» сменалэн сиё-дано усьтӥськонэз ортчиз.

Сменае Удмуртиысь, Татарстанысь но Башкортостанысь 100 нылпи вуиз.

«Туэ смена дырлы сӥземын, кызьы адями дыр куспын будэ, азинске, малпанъёсыз воштӥсько», – вераз егитъёслэн «Шунды» огазеяськонзылэн Тӧроез Александр Ильин.

«Шундыкар» 31-тӥ гудырикошконозь кыстӥськоз. Дас нунал нылпиос быгатонлыкъёссэз усьтыны но азинтыны тыршозы пӧртэм ӧръёсъя – блогинг но программирование, журналистика но литература, театр но мукет. Мастер-классъёс, спортъя но визез сынан шудонъёс, куноосын пумиськонъёс удмурт кылын ортчоз. Сменалэн валтӥсь ужпумез – нылпиосты удмурт лулчеберетэн тодматыны.

Котькуд ӧрлэн аслаз ӧнерчиез. Пиналъёс дас нунал ужрадъёсы ветлыло но сменалэн пумаз ужъемышсэз возьматыны быгатозы. 30-тӥ гудырикошконэ «Оранжевое настроение» лагерьын котькуд отрядлэн концертъёсыз ортчозы.

Лагере удмурт азьветлӥсьёс вуылӥзы ини: Влад Горжак, Илья Акилов, этноблогер Ирина Кожевникова, «Инвожо» журналлэн ӧнерчиосыз Наташа Кириллова но Дарали Лели.

Егитъёслэн йӧскалык лагерьзы Россиысь калыкъёслэсь лулчеберет узырлыксэз утё, со «Семья» йӧскалык ӵектослэн азьмугъёсызлы тупа.