2-тӥ южтолэзе Юкаменск ёросысь «Тылыс» туризмъя огъетын Вӧйдыр шулдыръяськон (0+) ортчиз. Таяз аре ужрадлэн валтӥсь темаез – ӟуч калык выжыкыл.

Шулдыръяськонэ муниципал кылдытэтъёсысь адямиос вуизы, оглом 19 кылдытэтъёсысь. Куноосты пумитазы Удмурт Элькунысь Кун Кенешлэн Тӧроезлэн воштӥсез, тодосъя, дышетонъя но граждан мерлык институтэз азинтонлы юрттэт сётонъя ялан ужась комиссиезлэн председателез Татьяна Ишматова, йӧскалык политикая министр Эдуард Петров, Юкаменск ёрослэн Тӧроез Дамир Касимов, Ӟуч лулчеберетъя огазеяськонэзлэн кивалтӥсезлэн воштӥсез Светлана Мельчикова.

Адямиослэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Куноослы шулдыр программа дасямын вал: вожвылъяськонъёс, эстафетаос, шудонъёс. Ортчытэмын «Растяни меха гармошка» вожвылъяськон. «Три богатыря» площадкаын ас кужымъёссэс мерттазы, «Веснянка прекрасная» вожвылъяськонын Веснянкалэсь дэремзэ адӟытӥзы. Нош «Сказочные превращения» вожвылъяськонын ӟуч калык выжыкылысь геройёслэсь образъёссэс возьматӥзы. «Маслёна-краса» нимо адӟытон-вожвылъяськон дасямын вал на, тужгес но усто Вӧйдыр мунё-сульдэръёсты адӟон понна.

Куноос трос ческыт сиён-юон веръязы. Ужрадлэн пумаз Вӧйдыр сульдэрез ӝуатӥзы, кудӥз тулыс вуэмез возьматэ.