Асьсэды возьматӥзы Ижкарысь 280-тӥ номеро нылпи садысь еврей группаысь пиналъёс, «Халом» арнянунал (воскресной) еврей школаысь дышетскисьёс. Пыриськисьёслы егӥтъёслэн клубзы дасяз нимысьтыз викторина, кудӥз сӥземын та праздниклэн историезлы.
Котькуд ар Пуримлэн тужгес но валтӥсь люкетэз «Пуримшпиль» спектакль луэ. Туэ пиналъёс возьматӥзы «Пижамная библиотечка» ӵектосысь Марина Бородицкаялэсь «Два шалахмонеса» нимо пьесазэ. Сюжетэз дано гожъясьчилэн Шолом-Алейхемлэн веросъёсысьтыз басьтэмын: Пурим шулдыръяськон дыръя кык нылашъёс саламъёсты нуон понна куное мыно, сюрес вылысен трос гинэ отысь ческыт сиён-юонъёсты сиё. Кӧтӝоже усем пиналъёсты но бадӟымъёсты буйгато раввинлэн яратон но эшъяськон сярысь ӟеч кылъёсыз.
Ужрад ӝӧксьӧр пуконэн йылпумъяськиз. Пыриськисьёсты но лыктэм муртъёсты «гоменташи» нимо сиён-юонэн куноятӥзы.

Калыкъёслэн эшъяськон юртысьтызы пресс-службалэн ивортодэтэзъя Калыкъёслэн Эшъяськон юртсы