УЭ-лэн Тӧроез Александр Бречалов «О положении в республике» арлы быдэ ортчись докладаз нимысьтыз саклык висъяз йӧскалык политика удысысь ӵектосъёслы. Тросэзлэн авторъёссы – со федерал но улосвыл грант вожвылъяськонъёсы пыриськисьёс.

«2023-тӥ аре коньдэтысь йӧскалык кусыпъёсты умоятон удысын коммерциен герӟаськымтэ мерлыко огазеяськонъёслэсь ӵектосъёссэс но ужрадъёссэс улонэ вӧлмытон понна 9 миллионлэсь трос уксё висъямын. Ми юрттӥмы озьы ик трос кичӧлтэмъёслы, кудъёсыз пӧртэм грант вожвылъяськонъёсын вормизы. Таӵе инъетъёс пыр элькунэ йылтыса 54 миллион манет ватсаськиз на», – пусйиз Александр Бречалов.

Президент ӵектосъя фондлэн юрттэмез улсын Удмуртиын куинь ӵектос улонэ вӧлмемын – удмурт дӥсьлэн лабораториез, медиашколаос, ДАУР-ТВ интернет-телевидение, «Высокий берег» фестиваль. Калыкъёслэн Эшъяськон юртсылэн командаез Россиякуспо «Гордость нации» премиез вормиз!

Александр Бречалов пуйсиз, 2024-тӥ аре Удмурт Элькунын ортчозы «Пельняньлэн калыккуспо нуналэз» юбилейной фестиваль, «Бадӟым этнографической диктант» но «Бадӟым удмурт диктант» акциос, Россиякуспо тужгес но усто муниципал практикаосъя «Мир в диалоге» форум, Россия Федерациысь улосвылъёсын улӥсь удмуртъёс понна Лулчеберетлы сӥзем нуналъёс. Таӵе ужрадъёс элькунмылэсь инлыксэ будэто, озьы шаермы куноосты золгес бордаз кыске.

УЭ-лэн Тӧроез ватсаз, 2023-тӥ аре пуш туризм будӥз шуыса – элькунэ мукет улосвылъёсысь 1,2 миллионлэсь трос адями вуылӥз. Та удыслы азьланяз но юрттэт сётӥськоз, «Туризм и индустрия гостеприимства» йӧскалык ӵектосъя, кудзэ Россия Федерацилэн Президентэз Владимир Путин кичӧлтӥз.

Со сяна, «Урарту» армян мерлыко огазеяськон но «Достлуг» азербайджан мерлыко центр йӧскалык спорт ӵошатсконъёс ортчытозы. «Громада» украин лулчеберетъя огазеяськон радъялоз Быдӟым Атыкай ожлы сӥзем трос йӧскалыкъем концертъёс, отчы ӧтьылозы нимысьтыз ожгар операцие пыриськисьёслэсь семьяоссэс.

Калыкъёслэн Эшъяськон юртсылэн но егитъёслэн йӧскалык-лулчеберетъя огазеяськонъёссылэн этноволонтёр корпуссы ужзэ азьланьтэ, соос 2024-тӥ арлы этнодырпус кылдытӥзы. УЭ-лэн Тӧроез ваньзылы ӵектӥз со дырпуслэн ужрадъёсаз пыриськыны.