Александр Бречалов йӧскалык культурая огазеяськонъёслэн азьветлӥсьёсынызы пумиськылӥз. Куартолэзь кутсконлы шаерамы йӧскалык культурая 38 огазеяськон лыдъяське.

«Элькунамы югдур каньыл — пусйиз Бречалов. Но буйгатскыны уг яра. Асьмелэн ужмы трос, оскисько одӥг командаен ужалом» — вераз Элькун Тӧролэсь ужзэ быдэсъясь. Улосын югдур сярысь ивортон лэсьтӥз йӧскалык политикая министрлэсь ужзэ быдэсъясь Лариса Буранова, Удмуртиысь калыкъёслэн ассамблеянызы кивалтӥсь Алексей Загребин, ӟуч культурая огазеяськонлэн тӧроез Виталий Тюльпин, «Удмурт кенешлэн» тӧроез Татьяна Ишматова, бигеръёслэн центрзылэн кивалтӥсез Ильсур Минемуллин, поръёслэн огазеяськонзылэн кенешсылэн тӧроез Анатолий Радыгин но мукетъёсыз.

Татьяна Ишматова люкаськемъёслы тодазы вайытӥз Удмуртия кунлык басьтэм дырысен даур тырмон юбилеез. Озьы ик огазеяськонъёслэсь азьветлӥсьёссэс но Тӧролэсь ужзэ быдэсъясез огӵошен ужаны ӧтиз. Кун Думалэн депутатэз Алексей Загребин ивортӥз антропологъёслэн но этнографъёслэн конгрессы сярысь. Ужрад пӧсьтолэзе Ижкарын ортчоз. Форуме 75 кунъёсысь 1500-лэсь ятыр тодосчиос пыриськыны мылкыд каро. Александр Бречалов вань ӵектонъёсты-дэмланъёсты лыдэ басьтыса, Удмуртилэн ужамез сярысь Россиын но озьы ик быдэс дуннеын мед тодозы шуыса, ваньзэ лэсьтыны оскытӥз. Бречалов таӵе пумиськонъёс кык арнялы одӥг пол ортчытъяны мылкыдзэ вераз. Озьы ик ӵектӥз элькунамы аспӧртэмлыко йӧскалык гурт пуктыны. Татын котькуд выжы калык пуктыны быгатоз аслэсьтыз юртсэ но со пыр тодматоз мукетъёсты калыкезлэн историеныз, улон радэныз но лулчеберетэныз. Со гурт калыклэсь тупаса улэмзэ возьматоз.