УЭ-лэн Тӧроез бордысь Паськытатэм Мерлыко кенешлэн йӧскалыккуспо герӟетъёсъя кенешонэз 30-тӥ коньывуонэ ортчиз. Калыкъёслэн огазеяськон нуналзы но Удмуртилэн кунлык басьтэм нуналэз азьын йӧскалык-лулчеберетъя но мерлык огазеяськонъёслэн огмуртъёссы пумиськонэ люкаськизы.

«Тӥляд валче ужаменыды элькунын каньыл но умой улон югдур кылдӥз. 2024-тӥ арын Удмуртиысь 84 ӵектос Президент гранъёсъя фондлэсь но лулчеберет кичӧлтонъёсъя Президент фондлэсь юрттэт басьтӥзы, оглом 100 миллион манетлы. Соос пӧлысь 36-ез – коммерциен герӟаськымтэ мерлыко огазеяськонъёс, кудъёсыз йӧскалык политика удысын тыршо. Со сяна, Удмуртия ПФО-ысь 9-эз улосвылъёсын ӵош вормиз Йӧскалык ужъёсъя федерал агентстволэн вожвылъяськоназ – со 2025-тӥ ар понна федерал коньдэтысь 11 миллион манет. Тау тӥледлы асьме ожгарчиосмылы юрттэмды понна. Йӧскалык-лулчеберетъя огазеяськонъёслэн ёзчиосыз нимысьтыз ожгар операцие но мозмытэм улосвылъёсысь адямиослы сиён-юон, эмъюмъёс, шуныт дӥськут но гожтэтъёс келяло», вераз Александр Бречалов.

УЭ-ысь йӧскалык политикая министр Эдуард Петров ватсаз: йӧскалык-лулчеберетъя огазеяськонъёслы ӵектосъёс кылдытыны юрттэ Калыкъёслэн Эшъяськон юртсы, кудӥз Россиысь этнокультура центръёс пӧлын огез тужгес но кужмоез луэ.

«2017-тӥ аре ваньмыз ик 13 ӵектос бордысен кутскиз, нош али та ар понна йӧскалык политика удысъя 65 заявка келямын ни. Тужгес но мыло-кыдо тыршо Ӟуч лулчеберетъя огазеяськон, «Удмурт Кенеш», «Шунды» егитъёслэн огазеяськонзы, «Куара» луонлыкъёс сётонъя центр, бесерман калыклэн мерлыкез», – пусйиз министр.

Йӧскалык-лулчеберетъя огазеяськонъёслэн азьветлӥсьёссы 6-сэ ӵектоссэс адӟытӥзы, соос кунмылэн кун йӧскалык политикаезлэн Стратегиезлы тупало. «Россиысь калыкъёслэн ассамблеязы» огазеяськонлэн Удмуртиысь ёзчиез Алина Жуйкова «Открытка памяти. Дружба народов» кичӧлтон сярысь вераз. Ужпум – пичиослэсь но егитъёслэсь тунсыкъяськонзэс кужмоятон понна открыткаос кылдытыны, интызэ вошъясь адӟытон пыр геройёслэн подвигъёсынызы тодматыны, ваньмыз та сӥземын луоз Быдӟым Атыкай тыложын 80 ар Вормонлы.

«Шундыкар» егитъёслы удмурт лагерь сярысь вераз «Шунды» егитъёслэн огазеяськонзылэн председателез Виолетта Токарева. Со пусйиз, «Шундыкар» али 13 ӧръёсъя ужа шуыса.

«Можем-Поможем. Семейный центр социокультурной адаптации мигрантов» ӵектосэн кенеше люкаськемъёсты тодматӥз «Россиысь калыкъёслэн ассамблеязы» огазеяськонлэн ёзчиез Мария Валтиева. Татын НКО-ос мигрант семьяосын кусыпъёсты юнмато, ӟуч кылэз дышетыны юртто.

Ӟуч лулчеберетъя огазеяськонлэн председателез Виталий Тюльпин «Поэтическая аллея» сярысь вераз, кудзэ Ижкарысь Эшъяськон Садын кылдыныны малпамын. «Одо мари ушем» пор огазеяськонлэн ёзчиез Елена Крупенева «В единстве наша сила» но «Сердце матери» ӵектосъёс сярысь мадиз. «Удмуртиысь бигер мерлыко центр» огазеяськонлэн ёзчиез Светлана Кайсина ӵектӥз нылпиосты но егитъёсты йӧскалык лулчеберетэз но кылъёсты крезьгур устолык пыр но эктонъёс пыр тодматыны.

Вераськонъёс бере НКО-ослэн ёзчиоссы юанъёссэс сётъязы но асьсэлэсь кичӧлтонъёссэс дэмлазы. Мерлыко кенешлэн йылпумъяськоназ Александр Бречалов ньылезлэсь огазеяськонъёслэсь азьмынӥсьёссэс (удмурт, ӟуч, бигер но пор) Таукаронъёсын данъетаз – тупаса но огкылысь улонэ бадӟым уж нуэмзы, этносъёс вискын ӟеч кусыпъёс кылдытэмзы но пиналъёсты но егитъёсты патриотизм мылкыдо будэтыны тыршемзы понна.