20-тӥ тулыспалэ Удмурт Элькунлэсь Тӧроезлэсь ужзэ быдэсъясь А.В. Бречалов мерлыко огазеяськонъёслэн азьветлӥсьёсынызы пумиськылӥз. Ужрад «Лудорвай» музейын ортчиз.

Пумиськонлэн валтӥсь темаез – йӧскалык гурт кылдытон. Элькунамы улӥсь калыкъёс татын тодматыны быгатозы асьсэлэн историенызы, лулчеберетэнызы, улон радэнызы. Люкаськемъёсты «ЭТНОМИР» ӵектосэн тодматӥз «Диалог культур – единый мир» фондлэн кивалтӥсез Руслан Байрамон. Со вераз Калуга улосысь йӧскалык гурт сярысь. Александр Бречалов пусйиз: «Таӵе ӵектосэз быдэстыку коньдон но инты валтӥсь интыын уг сыло. Адямилэн мылкыдыз вань ке, сюлэмыз калык понна висе ке – ваньзэ лэсьтыны луэ. Зэм но ӵектос капчи ӧвӧл. Мон шупотӥсько мерлыко огазеяськонъёслэн та кичӧлтонлы дурбасьтэмзылы. Мынам малпамея, Удмуртиын луыны кулэ интыос, кытын адямиос элькунамы улӥсь калыкъёслэн лулчеберетэнызы, сям-йылолъёсынызы тодматскыны быгатозы. Элькунмы сярысь асьмеос пӧртэм площадкаосын вераны кулэ». Гуртлэн интыяськемез сярысь кенешонъёс мыно на. Пумиськонын кенешизы: мерлыко огазеяськонъёс кык арня ӵоже асьсэлэн ёзчиосынызы кенешозы ӵектослэн пуштросэз сярысь. Бӧрысь нош ик А.Б. Бречаловен пумиськозы но йӧскалык гуртлэсь концепцизэ кутозы.