Улосвыллэн Тӧроез Александр Бречалов мерлык ӵектосъёс пыр удмурт кылэз школаосын но нылпи садъёсын дышетон пумысен вераз. Та ужпумъя юан вуиз Телеграм вотэсбамысь чат бот пыр, кудӥз юромо та ужрад понна кылдытэмын вал.

«Удмурт кылэз 169 нылпи садъёсын но 267 школаосын дышето анай кыл но факультатив чотын. Арняяз кӧня пол дышетсконо кыллы – та юанэз анай-атайёс дышетӥсьёсын ӵош малпаны кулэ. Ми удмурт кылэз утёнъя трос ӵектосъёслы юрттӥськомы. Соос Президент грантъёсъя но Лулчеберет кичӧлтонъёсъя Президентлэн фондъёслэн вормисьёссы луо. Мон оскисько, та ужлэн инъетэз – семья», – валэктӥз Александр Бречалов.

Со ватсаз, Удмурт Элькунысь йӧскалык политикая министерство но Сбер ӵош ужан сярысь тупанкыл кутӥзы – GigaChat (Гигачат) нейросеть сӧзнэт удмурт кыллы дышетскыны кутскоз. Сӧзнэтэз дышетон вылысь, элькун удмурт кылэ берыктэм текстъёсты радъясь-лэсьтӥсьёслы сётоз. Отчы пырозы книгаос, статьяос, тодослыко-дышетон печатламъёс, мерлыко вотэсбамъёсысь постъёс но мукет материалъёс. Искусственной визьбурез удмурт кылын «вераськытон» понна, та ӧнерчиос удмурт кылын вераськись адямиосын ужалозы, сӧзнэтэ вачевераськонъёсты но мукет ивортодэтъёсты ватсалозы.

Со сяна, элькунмы «Яндекс»-эн ужанзэ азьланьтэ. Тодослыко центръёс но вылӥ дышетсконниос берыктонлэсь ӟечлыксэ эскерозы-тупатъялозы на.

Вань мылкыд карисьёслы удмурт кылъя дунтэк курсъёс радъямын. Соос Удмуртиын арнялы кык пол 13 площадкаосын ортчо. Ижкарын – со Удмурт кун университет. Гожтӥськоно номеръёсъя: +7 (3412) 68-59-20, +7 (3412) 91-61-66.

УЭ-ысь йӧскалык политикая министерство но «Удмурт Кенеш» мерлык огазеяськон быдэс элькунамы улонэ вӧлмыто «Билингва» ӵектосэз – Президент грантъёсъя фондлэсь вормисьсэ. Ижкарын со Калыкъёслэн Эшъяськон юртазы радъяське пӧртэм мастер-классъёс, лекциос, анай-атайёслы семинаръёс чотын. Нылпиослы шудонъёс, крезьгуръя, театръя но мульстудияя ужрадъёс ортчо. Отчы 2-10 аресъем пиналъёсты вайыны луэ.

Нылпиос, егитъёс, кылтодосчиос но дышетӥсьёс понна мобильной ватсэтъёсты но пӧртэм IT-продуктъёсты адӟытыны но уже кутыны луэ. Кылсярысь:

— удмурт кылэз но литератураез дышетонъя «Удмурт кылдунне» портал: https://udmkyl.ru/

— «Удмурт йӧскалык кылшыкыс» (Национальный корпус удмуртского языка») утчан сӧзнэт: https://udmcorpus.udman.ru/home

— «Яндекс. Навигатор» удмурт кылын: https://clck.ru/35yXyt

— «Арки» дышетонъя лаборатория: https://arki-lab.ru/