18-тӥ оштолэзе Удмурт Элькунлэн Тӧроез Калыкъёслэн Эшъяськон юртазы «Удмурт Элькунысь ӟуч лулчеберетъя огазеяськон» мерлыко огазеяськонлэн ёзчиосыныз пумиськиз.

Пумиськонын Александр Бречаловез ёзчиос тодматӥзы огазеяськонлэн азинлыко ӵектосъёсынызы. Соос пӧлны «Высокий берег» фольклор фестиваль, кудӥз туэ 7-тӥ ползэ радъяськоз ини. Ужрад ортчоз Нечкиноын, со сяна «Кама» турист базаын но куд-ог площадкаос ужалозы.

Александр Бречалов фестивалез радъясьёслэн но Сарапул ёрослэн кивалтэтэзлэн кичӧлтонзылы дурбасьтӥз. Элькун Тӧро пусйиз, радъясьёслы ужано фестивале пыриськисьёслэсь но учкисьёслэсь лыдзэс будэтон бордын, фестивалез азинтон, эшъёс но юртисьёс утчан бордын. Озьы ик со кыл сётӥз ёзчиослы ӵектосэз учкымон лэсьтыны но воксё мукет уровене поттыны юрттыны.

Мукетыз ӵектос – Д.К. Зеленин нимо «Окно в небо» IX калыккуспо фестиваль, кудӥз 6-8-тӥ пӧсьтолэзе Дэри ёросын ортчоз. Пусъёно на, та ӵектосэз быдэстыны огазеяськон Президен гранъёсъя фондысь 2 млн. манет утӥз.

Проектёсты азинтон вылысь, Александр Бречалов ёзчиослы дэмлаз «Корпорация развития Удмуртской Республики» акционер огазеяськонлэн туризмъя директореныз Алексей Даутовен ӵошен малпаськыны но медиа-план кылдытыны.

«Удмуртиын трос тунсыко материл, аспӧртэмлыко ӵектосъёс, учкымон сямъёс, асьмелы ӵектосъёсмес шонер «дӥсяны» но азинтыны дышетскыны кылиз на. Асьмеос ӵошен дышетскоме ӵектосъёсын кивалтыны, соосты азинтыны но вӧлмытыны», – вераз Александр Бречалов.

Удмуртилэн Тӧроез тау кариз люкаськемъёслы пумиськонэ вуэмзы понна но кичӧлтонъёссы понна, кыл сётӥз юрттыны соослы.