«Удмуртия» телеканалын Меӵак эфирын Тӧро Александр Бречалов 70-лэсь трос юанлы валэктон сётъяз, улосысь мингрантъёслэн улонзы сярысь но мадиз. Со вераз, мигрантъёс сярысь лыдпусъёсты УЭ-ын Россиысь МВД-лэн официальной вотэсбамысьтыз шедьтыны луэ шуыса.

«Та тема мур малпаськонэ уськытӥсь луэ. Элькунын ужан кадръёсъя шуг-секытъёс кылдэмен, кунгож сьӧрысь ӧнерчиосты дышетонъя бадӟым уж нуиськыны кулэ. Татын котыр ласянь уж мынэ, нимаз ужбергатӥсьёс пӧлын но. Соос но кылкутыны кулэ, адямиосты мукет кунъёсысь уже басьто ке», – вераз Александр Бречалов.

Тӧро ватсаз, элькунамы кӧня ке ӵектосъёс улонэ вӧлмо шуыса, кунгожсьӧрысь муртъёс ӟуч кылэз, элькунлэсь лулчеберетсэ но сям-йылолъёссэ мед дышетозы но тодозы. Кылсярысь, йӧскалык политикая министерство, Ижкар Администрация но Удмуртиысь муфтият Азиысь вуэм нылпиослы но атай-анайёссылы ӵектос кылдытӥзы. Нырысетӥез ужрад Азин нимо урамын ортчиз Соборной мечетьын. Пыр-почгес тодмаскыны но проектэ пыриськыны луэ та номеръя: 68-75-20 (доб. 120).

Со сяна, 7-тӥ толсуре Калыкъёслэн Эшъяськон юртазы «Можем-Поможем» семья субботникъёс ужаны кутско. 30-лэсь трос семьяос 6-12 аресъем пиналъёсынызы ӵош кылъя ужрадъёсы, шудонъёсы но мастер-классъёсы пыриськыны, ӧнерчиослэсь тодон-валан басьтыны быгатозы. Ӵектос Росмолодёжлэсь грантсэ вормиз. Ивортодэт солэн огинъёсаз поттӥське.

«Ужез азинтоно но ваньзэ огазеяськыса, валче лэсьтоно. Кылсярысь, Глазкарын трос нылпиё кунсьӧр семья улэ. Соос эмъюртын ужало, пациентъёслэсь соос сярысь ӟеч кылъёс гинэ кылоно луэ», – йылпумъяз Александр Бречалов.

Тодэ вайытомы, Дамир но Альфия Усмановъёс Глазкарысь ёроскуспо эмъюртын кылем арлэн гудырикошконысеныз ужаны кутскизы, соос Киргизиысь вуизы. Ярато Россиялэн пӧртэм интыостӥз ветлылыны, Удмуртия но соос пӧлын. Дамир – анестезиолог-реаниматолог, Альфия – эпидемиолог. Кузпалъёслэн ньыль нылпизы, берпуметӥез Глазкарын вордскиз ини.

Удмурт Элькун Тöролэн но Кивалтэтлэн нимлыко вотэсбамызысьтыз