Туннэ элькунмылэн Тӧроез Александр Бречалов пыриськиз инмарлы вӧсяськонэ, кудӥз мусульманъёслэн огез валтӥсь праздниксылы – Ураза-байрамлы – сӥземын. Тӧро Ижкарысь соборной мечете ветлӥз Фаиз-хазрат Мухамедшинэз но вань калыкез ӟечкыланы. Ужрадэ озьы ик пыриськизы йӧскалык-лулчеберетъя огазеяськонъёслэн кивалтӥсьёссы но мыло-кыдо ужасьёссы, элькунысь быдэсъясь тӧрлыклэн, карысь но Ленин ёросысь огмуртъёссы, депутатъёс.

Намазэз муфтий Фаиз-хазрат Мухамедшин ортчытӥз. Со люкаськемъёсты ӟечкылаз но улонэ вӧлмись ӵектосъёс сярысь мадиз. Озьы ик со пусйиз, соос карын улӥсьёслы юрттӥсько, кин юрттэт куре, вӧсьбурзы но йӧскалыксы шоры учкытэк шуыса. Со сяна карын шутэтскон интыосты чеберъя н сярысь но муфтий вераз.

Фаиз-хазрат мадиз на мигрантъёслы мечеть бордын ӟуч кылэз дышетонъя дунтэк курсъёс ортчытъясько шуыса. Со лэсьтӥське мигрантъёс асьме дорын мед ӟеч но каньыл улыны дышетскозы шуыса. Курсъёсты диаспораослэн кивалтӥсьёссы но асьсэос мигрантъёс радъяны юртто.

Удмуртилэн Тӧроез люкаськемъёслы тау кариз мерлыко уже мыло-кыдо пыриськемзы понна. Озьы ик пусйиз Удмуртиысь мусульманъёслы мерлыко ӵектосъёсты улонэ пыӵатэмзы понна. Кылсярысь, «Мамина радость» фонд но Мусульманъёслэн духовной кивалтэтсы юрттэт лэсьтэ куинезлы Ижкарысь нылпи ваён юртъёслы, Воткакарын но Балезиноын нылпи куштонлы пумит луись кабинет усьтӥзы. Удмуртиысь мусульманъёс трос нылпиё семьяослы юртто, анай-атайтэк кылем пиналъёслы. Соослэн кичӧлтэмзыя Ижкарын личностез азинтонъя центр, дышетскисьёслы туризъя клуб но футболэн шудонъя манеж кылдӥзы. Озьы ик 4-тӥ номеро клиникая кар эмъюртын огез кабинет выльдэмын, отын анай-атайёс вордыны басьтоно пиналъёсын тодматскыны быгато.