Калыкъёслэн Эшъяськон юртазы этноволонтёръёс но лулчеберетъя йӧскалык огазеяськонъёсысь егит азьветлӥсьёс люкаськизы. Котырес ӝӧк сьӧрын соос кичӧлтонъёссы но уже кутэм ӵектосъёссы сярысь Удмуртиысь Тӧролэн но Кивалтэтлэн Администрацизылэн кивалтӥсезлы Александр Журавлёвлы, «СВОй резерв18» программае пыриськисьёслы Алексей Николаевлы но Евгений Тынныйлы  веразы. «Егитъёс но нылпиос» йӧскалык ӵектос но улосвыл программа егитъёслэсь проектъёссэс улонэ вӧлмытыны юртто.

Александр Журавлев Алексей Николаевен но Евгений Тынныйен тодматӥз: «Асьме улосвыл «СВОй резерв18» программамез федерал уровеньын вылӥ дунъяло. Али кенешонъёсы, ужрадъёсы пыриськиськомы, тӥ кадь мыло-кыдо азьветлӥсьёсын тодматскиськомы – вераськиськомы-ужаськомы. Пумиськонъёс сэрен элькунамы выль тунсыко ӵектосъёс кылдо. Кичӧлтон, кызьы тӥ тодӥськоды – лэсьтэ».

Этноволонтёр корпусэз вераз, кудӥз 2023-тӥ арысен ужа. Али отчы 700 азьветлӥсьёс пыро, соос ӧжытсэ 100 ужрадъёсы пырисько.

Пыр-поч та уж сярысь Удмуртиысь этноволонтёръёслэн корпуссылэн координаторез Роман Серов вераз: «Али милям вить штабмы но ёросъёсын кызь куинь группа ужа. Егитъёс пӧртэм ужрадъёсты радъяны юртто, со сяна калык эшъяськонлы сӥзем урокъёс ортчытъяло но со малпанэз огъёзъёссылы выжто».

Корпуслэн кураторез Мария Валтиева этноволонтёръёслэн Удмуртиысь калыкъёслэн музей-лабораториенызы ужаменызы тодматӥз. Улосвылысь калыкъёслэн лулчеберетэнызы тодматон понна адӟытонын (6+) VR-экспозиция но AR-ватсэтъёс кутӥсько. Адӟытонэз Калыкъёслэн Эшъяськон юртсылэн 2-тӥ этажлэн холлаз учкыны луоз, 4 сюрслэсь трос адями сое адӟыны вуиз ини.

Быдӟым Атыкай ожын 80 ар Вормонлы но Удмуртия кунлык басьтэмезлы 105 ар тырмонэзлы сӥзьыса, асьсэ кылдытэм плакатъёсты «БУД 4.0 – новые открытия» ӵектосэ пыриськисьёс этноволонтёръёс Никита Моромов но Полина Сальникова адӟытӥзы.

Удмурт егитъёслэн «Шунды» мерлыко огазеяськонзылэн ёзчиез Мария Лекомцева «Шундыкар» лагерь сярысь вераз. Али дырлы сменае сюрон понна куриськонъёсты куто.

«Лагерьлэн программаяз пӧртэм ӧръёсъя творческой занятиос пыро, кудъёссэ элькунысь тодмо ӧнерчиос ортчыто, озьы ик удмурт кылын шулдыръяськон программа радъяське. «Шундыкар» лагерез йӧскалык кадръёслэн кебитсы шуыса нимало. Троэз тодмо адямиос лулчеберет, литература, устолык, журналистика но мукет удысъёсысь нырысетӥ ӧнерлыко тодон-валанъёссэс но быгатонлыкъёссэс ӵапак татын басьтӥзы», – вераз нылаш.

Программист, инженер-разработчик, ватсэтъёсты кылдытӥсь  Григорий Григорьев пыр-поч вераз удмурт кылэз но лулчеберетэз вотэсын вӧлмытӥсь онлайн-продуктъёс сярысь, мургес ик «Яндекс.Навигаторез» берыктон, удмурт кылэз ас коже дышетонъя «Кылдысин» ватсэт сярысь.

Мария Елпашева но Елена Белкова «Родина – значит вместе!» ӵектослэн «ИгроБУМ» элькун вожвылъяськонэз улсын кылдытэм улосвыл ӝӧквыл шудонъёсты возьматӥзы. Соос пӧлын «МифОмир» шудон, кудӥз удмурт но ӟуч калыкъёслэн мифологической геройёсынызы тодматэ.

Пумиськонын озьы ик вал Валерия Титова – дышетӥсь, кылчи, «Можем-Поможем. Семейный центр социокультурной адаптации мигрантов» ӵектослэн пыриськисез, Италмас черкогуртысь Элькун лицей-интернатысь но «Добро.ру» ӵектосысь этноволонтёръёс, УЭ-ысь Кун Кенеш бордысь Егитъёслэн парламентысьтызы лулчеберетъя, туризмъя но йӧскалык политикая комитетсылэн кивалтӥсез Егор Кузовлев.