Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев УЭ-ысь армян, азербайджан, таджик но узбек йӧскалык лулчеберетъя мерлык огзеяськонъёслэн кивалтӥсьёсынызы пумиськиз. Соос Красногорскысь (Москва улосвыл) «Крокус сити холл» концерт залын ортчем теракт сярысь вераськыны люкаськизы.

«Вотэс бамъёсын трос ивортодэт понэмын кутэмъёслэн йӧскалыксы пумысен. Но тӥ адӟиськоды, кызьы уродзэ малпасьёс вотэсын та ужпумез вӧлмыто. Асьме элькунамы тупаса улон – вань йӧскалык-лулчеберетъя огазеяськонъёслэн кема кыстӥськись но секыт ужъемышсы. Кылем арын НКО-ос ӵошен 20 ужрадъёс ортчытӥзы, кудаз оглом 16 000 адями пыриськиз», – пусйиз Александр Журавлев.

«Ориён-Тадж» таджик мерлык огазеяськонлэн кивалтӥсез Мирзо Умаров ватсаз, быдэс огазеяськонзы 22-тӥ южтолэзе терактын быремъёслы мур куректэмзэс вераз шуыса. Таджикъёслэн тыршемзы элькунлэн азинсконэзлы сӥземын – азьмынӥсьёссы начар улӥсь семьяослы но кунсьӧр студентъёслы юртто, мерлык ужъюртъёсы ветлыло. Арлы быдэ «Новруз Байрам» праздник, Таджик кыллэн нуналэз, озьы ик «Вахдат» нимо кусыпез тупатонъя но йӧскалык соглаш луонъя Нунал ортчытъясько.

«Ог-огенымы трос вераськыны кулэ (ми озьы ик кариськом), котькуд чыры-пыры югдуръёслы саклыкмес висъяськом», – пусйиз «Достлуг» азербайджан мерлык центрлэн председателез Зульфигар Мирзаев. Солэн ёзчиосыз Муслим Магомаев нимо крезьгур вожвылъяськон радъяло, визьбуро шудон, шашкиен но кузь нардыен турнир ортчытъяло, арнянунал (воскресной) школа ужа. Озьы ик вань «Огни Азербайджана» йӧскалык энтонъя туркым, КВН-ъя, «Хазар» мини-футболъя командаос.

Пумиськонын озьы ик вал «Азия Плюс» узбек йӧскалык центрлэн кивалтӥсез Мухутдин Бахридинов. Узбек огазеяськонлэн ёзчиосыз сирота кылем нылпиослы юртто, футбол команда но творческой ансамбль кылдытӥзы.

Армянъёс но тазалыко улонлы бадӟым саклык висъяло. Арлы быдэ соос мини-футболъя, волейболъя, ӝӧквыл теннисъя но шахматэн шудонъя йӧскалык турниръёс ортчытъяло. Котькуд ӵошатсконэ трос гинэ адями пыриське. «Урарту» мерлык огазеяськонлэн кивалтӥсез Мнацакан Аракелян луэ.

Пумиськонэ пыриськисьёс огкылысь пусйизы, валтӥсь саклык будӥсь пиналъёслы сӥзёно – соослы юрттоно школалы, вылӥ дышетсконниослы дышыны, удмурт но ас калыкедлэн лулчеберетэз сярысь вералляны.

«Армянъёс, азербайджанъёс, таджикъёс но узбекъёс ас шаерысьтызы адямиоссылы юртто улон интыен, ужен но оглом асьме мерлыкамы улонлы дышонэн, со сяна, катрадлыкен тодмато, семьяосынызы кусып возё. Нимысьтыз ожгар операциын кунмес утисьёсмылы но соослэн семьяоссылы юрттэт сёто, кунмес утё», – люкаськемъёслы тау карыса, вераз Александр Журавлев.