Ижкарын Калыкъёслэн эшъяськон юртазы Россиысь но Белорусиысь калыкъёслэн огазеськонзылы сӥзем сӥё-дано ужрад ортчиз. Тодамы ваёмы, Россиысь но Белоруссиысь калыкъёслэн огазеяськон нуналзы 1996-тӥ арысен пусйиське. Ӵапак соку та кунъёс эшъяськон сярысь огкыл гожтӥзы вал.

Удмуртиысь Тӧролэн но Кивалтэтлэн Администрацизылэн кивалтӥсез Александр Журавлев пусйиз та нуналлэсь бадӟым кулэлыксэ. Кунмылэн азьмуртэз Владимир Путин ӵукна ини ӟечкылаз Белоруссилэсь азьмуртсэ Александр Лукашенкоез та нуналэн.

Александр Журавлев ватсаз, Удмуртия мыло-кыдо Белоруссиен ужа шуыса: «2016-тӥ арысен Брест Ижкарен эшъяськем каръёс луо. Кыкезлэн ик карлэн Быдӟым Атыкай ожен но тушмонэз вормонэн герӟаськем узыр историез. Кема ӧвӧл Удмуртиысь «Concordium» хор Минскын «Славянские встречи» калыккуспо вожвыляъськонэ пыриськиз, гран-при утӥз. Нимысьтыз тау карон кылъёс Николай Дмитриевич Украинецлы. Ужрадъёсты ортчытонъя Удмуртись йӧскалык-лулчеберетъя огазеяськонъёс пӧлын тӥ нырысетӥ интыосын сылӥськоды котьку. Белоруссия –  асьме оскымон эшмы но партнёрмы. Тау ваньзылы, кудъёсыз эшъяськонэз кылын, ужен но сюлмын уте но азинтэ».

Озьы ик Удмуртиысь «Батьковщина» белорус лулчеберетъя огазеяськонлэн кивалтӥсез Николай Украинец ваньзэсты ӟечкылаз.

Ужрадын нимысьтыз саклык устолыклы висъязы. Куноослы кырӟаны-эктыны быгатэмзэс возьматӥзы П.И. Чайковский нимо кыкетӥ номеро устолыкъёсъя нылпи школаысь «Город» эктонъя ансамбль, Ижкарысысь крезьгуръя колледжысь «Зоренка» ансамбль, укмысон витетӥ номеро нылпи садысь пиналъёс но «Лудорвай Кенакъёс» фольклоръя ансамбль.

Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа. Ужрадэз йылпумъязы Анатолий Мамонтов нимо кырӟанъя но эктонъя «Италмас» кун академической ансамбльлэн артистъёсыз. Соос трос пол гинэ Белоруссие вуылэмын ни.