Вуж Выль ар азьын Калыкъёслэн Эшъяськон юртазы йӧскалык-лулчеберетъя мерлык огазеяськонъёслэн огмуртъёссы люкасько, йылпумъянъёс лэсьтыны но валтӥсь эсэпланъёс радъяны. Та пумиськон нырысьсэ ортчиз «Содружество» калыккуспо мерлыко премия амалэн.

Удмуртиын 130-лэсь трос пӧртэм калыкъёс уло, 42 йӧскалык-лулчеберетъя огазеяськонъёс ужало-тыршо. Котькуд ар соос Калыкъёслэн Эшъяськон юртсылэн но УЭ-ысь йӧскалык политикая министерстволэн юрттэменызы 350-лэсь ятыр ужрадъёс ортчыто, туж кулэ луись ӵектосъёс улонэ вӧлмо. Таӵе ужрадъёс быдэсак тупало «Культура» йӧскалык ӵектослэн азьмугъёсызлы, кудзэ Россия Федерацилэн Президентэз Владимир Путин кичӧлтӥз.

«Содружество» премия нырысьсэ ортчытӥське, йӧскалык-лулчеберетъя огазеяськонъёслэсь ужъёссэс данъяны но кун йӧскалык политикаез улонэ пыӵатон удысысь тужгес но усто ужъёсты бырйыны. Кивалтэт Администраци кивалтӥсьлэсь ужзэ быдэсъясь Александр Журавлев «За вклад в этнокультурное развитие и укрепление единства народов Удмуртии» номинациын вормисьёсты ӟечкылаз. Со – Вань удмуртъёслэн «Удмурт кенеш» мерлыко огазеяськонзы, Ӟуч лулчеберетъя огазеяськон но Йӧскалык-лулчеберетъя улосвыл бигер аскивалтон. Кун йӧскалык политикаез улонэ пыӵатон, элькунын тупаса улон инъетэз кылдытон, егитъёсты патриотизм мылкыдэн будэтон понна таукаронэн пусъемын Николай Украинец, Марк Гольдин, Абдуллина Алия, Николай Ямаков но Виталий Тюльпин.

«2023-тӥ арын йӧскалык-лулчеберетъя огазеяськонъёс трос пӧртэм ужрадъёссэс ортчытӥзы, со луэ соослэн огазеяськонлы, ӵош луонлы мылкыдзы, – пусйиз йӧскалык политикая министр Эдуард Петров, – калыккуспо ужрадъёс, спартакиадаос, вожвылъяськонъёс, мастер-классъёс – ваньмыз та огазея асьме калыкъёсты. Асьмеос одӥг пыжын одӥг ӧрын уяськомы. Тупаса улон но ог-огдэ валан ӵапак татын, Удмуртиын, огинэ вуо».

Вань удмуртъёслэн «Удмурт кенеш» мерлыко огазеяськонзы арлы быдэ ортчытэ элькун Гербер, удмурт кыллэн Нуналэзлы сӥзем пӧртэм амалъем ужрадъёс. 2023-тӥ арын Кузебай Гердлэн но Ашальчи Окилэн вордскемзы дырысенызы 125 арлы сӥзем акциос ӟеч радъямын вал. Ӟуч лулчеберетъя огазеяськон арлы быдэ Удмуртиысь но кунысьтымы мукет улосвылъёсысьтыз трос адямиосты люка «Высокий берег» но «Окно в небо» нимо фестивальёсы. Йӧскалык бигер аскивалтонлэн туж усто ортче Сабантуй шулдыръяськонэз, литературалы сӥзем кунокуа висъетъёс ортчо.

«Бадӟым трос йӧскалыкъем семья – мукет сямен уд но шуы асьме йӧскалык-лулчеберетъя огазеяськонъёс сярысь. Ар пала мон удмурт но мукет калыкъёслэсь лулчеберетсэс эскерисько, кудъёсыз татын уло. Тросэныз соосын мон тодмо. Быгатӥсько вераны, Удмуртия – асьме кунысьтымы тужгес но эшлыкоосыз пӧлысь луэ. Зэмзэ но, со тӥляд татын улӥсь адямиосын, соослэн сям-йылолъёссынызы ӟеч кусып возён. Тау карисько элькунын тупаса улон югдурез кылдытон но лулчеберетэз но кылъёсты вӧлмытон кичӧлтэмъёс понна», – пусйиз Александр Журавлев.

Озьы ик йӧскалык-лулчеберетъя огазеяськонъёс пусъемын вал таӵе номинациосын: «За вклад в сфере сохранения и развития родных языков», «За укрепление института семьи и традиционных семейных ценностей», «За сохранение духовно-нравственных ценностей, традиций и укрепление национального согласия».
«2023-тӥ ар асьме понна йӧно-буро ар вал, Калыкъёслэн Эшъяськон юртсы 15 ар талэсь азьло йӧскалык-лулчеберетъя огазеяськонъёслэн юрттэменызы кылдӥз. Ми азьланьтӥськомы огазьын ужанэз, мед милям кунмы эшшо но кужмогес луоз шуыса. Оскисько, «Содружество» мерлыко премия паськыталоз но тросгес адямиосты ас котыраз огазеялоз», – Калыкъёслэн Эшъяськон юртсылэн директорез Юлия Шахтина вераз.