2000-тӥ арысен котькуд аре 21-тӥ тулыспалэ асьмеос пусйиськомы Анай кыллэсь калыккуспо нуналзэ. Удмурт Элькунысь йӧскалык политикая министерстволэн юрттэмезъя та нуналлы сӥзьыса трос пумо ужрадъёс ортчо.

Наука удысэз ке басьтоно, та нуналъёсы радъямын котырес ӝӧкъёс, конференциос. Тани соос пӧлысь куд-огез. «Комплексные исследования: Богатство граней удмуртского края» (Глазкар, 11-тӥ тулыспал); Удмурт Элькунысь калык кылбурчилэн А. Леонтьевллэн 70 аресэзлы сӥзем конференци (Можгакар, 12-тӥ тулыспал); тодосъя но дышетонъя калыккуспо форум «Международная неделя многоязычия в УдГУ» (17-21-тӥ тулыспал); удмурт кылбучилэн Ф.Васильевлэн вордӥськем дырысеныз 80 ар тырмонэзлы сӥзем «Флоровские чтения» IV Калыккуспо конференци (Глазкар, 27-28-тӥ южтолэзь). Та площадкаос бадӟым луонлык сёто анай кылъёссты эскерыны, соосты утён но азинтон сярысь кенешыны, вормонъёсын но шуг-секытъёсын вошъяськыны.

Мукетыз бадӟым ужпум, кудӥз ӝутӥське ужрадъёсын та нуналъёсы – нылпиослы но егитъёслы анай кылзэс гажан но яратон пыӵатон, сое дышетоныны мылкыдзэс ӝутон. Озьы 16-тӥ тулыспалэ ортчиз ини нылпиослы бигер кылын потӥсь «Золотой клубок» журналэн тодматскон. 19-тӥ тулыспалэ удмурт кылбучиез Ф. Васильевез буре ваизы вордӥськем музъемаз, Яр ёросын. Кузебай Герд нимо гимназиын 20-тӥ тулыспалэ радъяськозы котырес ӝӧкъёс, мастер классъёс. Татын эскерозы удмурт, бигер, пор кылъёсты дышетонэз, сэрттозы-пертчозы анай кылъёсты дышетонын пумиськись могӟетъёсты но шуг-секытъёсты. 21-тӥ тулыспалэ Калыкъёслэн эшъяськон юртазы люкаськозы ог 100 пиналъёс, кудъёсыз «Родной язык, я тебя берегу!» вожвылъяськонын лыдӟозы анай кылазы кылбуръёс. Произведениос чузъяськозы 11 кылъёсын! 2-тӥ южтолэзе Калыкъёслэн эшъяськон юртазы ортчоз украин кылбурчилэн Т. Шевченко вордӥськем дырысеныз 200 ар тырмонэзлы сӥзем ӝыт. Ныли садэ ветлӥсьёс но дышетскисьёс Т.Шавченколэсь кылбуръёссэ пӧртэм кылъёссын лыдӟозы.

Озьыен, та толэзь тырмемын анай кыллы сӥзем ужрадъёсын. Таӵе югдур котькинэ шумоттэ, малпаськомы. Оскон кылдэ элькунамы улӥсь калыкъёс анай кылзэс уз вунэтэ, сое утён, азинтон но вӧлмытон сярысь нуналысь-нуналэ сюлмаськозы шуыса.

Удмурт Элькунысь йӧскалык политикая министрлэсь ужзэ быдэсъясьлэн Л.Н. Бурановалэн малпамезъя, анай кыллэн калыккуспо нуналэзлы сӥзем ужрадъёс кылъёсты утён понна гинэ уг ортчытӥсько, соослэн валтӥсь мугзы – одӥг улосын ӵош улӥсь пӧртэм калыкъёсты ог огзылэн лулчеберетэнызы, сям-йылолъёсыны тодматон. Та ужрадъёс ог-огдэ гажаны, валаны, чиданы, тупаса улыны дышето.