«О государственных языках Удмуртской Республики и иных языках народов Удмуртской Республики» кат улсын мынэ туж кулэ луись уж – ужъюрт нимпулъёсты, штампъёсты, штемпельёсты, озьы ик интыним нимъёсты (Удмурт Элькунысь гуртъёсты, шуръёсты, тыосты) удмурт кылэ берыктон.

Та кат ужаны кутскиз 2001-тӥ арысен, нош 2022-тӥ аре отчы воштӥськонъёс пыртэмын: Удмурт Элькун юрттэмен дасям рекламаосты, баннеръёсты, видеорекламаосты лэсьтыны кулэ Удмуртиысь кыкеныз ик кун кылъёсын – ӟуч но удмурт сямен.

Берыктон удысын тырше удмурт кылын Нимкылъёсъя но шонер гожъяськонъя элькун ӧри. Комиссия ужа йӧскалык политикая министерство бордын, кудӥзлэн кивалтӥсез луэ министр Эдуард Петров. Ӧрилэн огинэтаз (составаз) пыро министерствоысь ужасьёс, тодосчиос, дышетӥсьёс, журналистъёс. Со лыдметэн пыр-поч тодматскыны быгатӥськоды татын.

Кун Кенешлэн Президиумез но Удмурт Элькун Кивалтэт 1995-тӥ аре 30-тӥ коньывуонэ 103/316-тӥ номеро «О республиканской термино-орфографической комиссии по удмуртскому языку» пуктэт кутӥзы. Солэн ужпумъёсыз паськытэсь но трос пуштросоесь. Ӧрилы бадӟым радъян уж нуоно. Солэн компетенцияз пыро выль нимкылъёсты но валатонъёсты кылдытон, собере соосты пумен-каллен кыл фондэ пыртон, удмурт кылэз азинтон, озьы ик терминологиез, шонер гожъяськонэз, интынимъёсты радъян.

Кызьы ужа ӧри?

«Ми доры вуэ курон яке ас мылкыдъя берыктон уж лэсьтӥськом. Интынимъёс сярысь ке верано, ёросъёсы куронъёс асьмеос лэзиськом, но собере соос келяло милемлы асьсэ гурт интыоссылэсь лыдметсэс, шур нимъёсты но лыдэ басьто, кудъёсты кулэ берыктыны. Бӧрысь комиссия та нимъёсты эскере, собере ини берыктэмъёсты юнматон уж мынэ, со радъям текстъёс берен ёросъёсы кошко», – валэктӥз ӧрилэн подъясез Мальвина Уракбаева.

Комиссия ини 28 ар ужа. Та дыр куспын трос уж лэсьтэмын, кылсярысь, берыктэмын вал Кункат (Конституция), дасямын Транспорт но сюрес возёсъя министерстволы вань ёросъёсысь выльдэм нимъёс, кудъёсыз сюрес вылын пусйиськыны кулэ. Али ӧри ужа урам нимъёсты берыктон бордын. Ижкарысь урамъёс берыктэмын ни, соосты юнматыны кылиз на. Лыдметын 1500-лэсь трос урам. Азьпалан таӵе уж сылэ: мер транспортын дугдылонниослэсь нимъёссэс удмуртэ берыктыны, соосты куараян понна. Туннэ нуналэ удмурт кылын ӟеч кыл сӥзёнъёсты кылыны луэ трамвайёслэн берпум дугдылонниосазы.

«Ми котьку шумпотӥськомы, куке ми доры удмурт кылэ берыктон ужен вазисько, муниципал ужъюртъёс сяна, частной огазеяськонъёс но. Кылсярысь, Йӧскалык банк нырысьёсыз пӧлысь вал, собере «Пятёрочка», «Магнит», «Магнит Косметик» вузкаронниос. Озьыен, кин вазиське – ваньзылы юрттӥськом. Юридик лицоослы берыктӥськом дунтэк», – вераз Удмурт Элькунлэн йӧскалык политикая йӧскалык кусыпъёсты умоятон ёзэтлэн кивалтӥсезлэн воштӥсез Мальвина Уракбаева.

Берыктонэз быгатӥськоды лэсьтытыны йӧскалык политикая министерстволэн приёмнояз жингыртыса таӵе номеръя 8 (3412) 685 355.

Удмурт кыл сярысь ивортодэт учкыны луонлык вань «Вконтакте» вотэсбамын Удмурт кылын нимкылъёсъя но шонер гожъяськонъя Элькун ӧри группаын.