Артана – удмурт кыл. Ужрадэз ортчытӥсьёслэн валэктэмзыя, кызьы писъёс артана кылдыто, озьы ик пӧртэм калыкъёс огзы вӧзын огзы уло но чебер рад кылдыто.

Ӵектос куинь этаплэсь сылэ. Нырысетӥ этап – студентъёсыз йӧскалык дӥськутэн но кылэн тодматон. Кылсярысь, нырысетӥ нуналэ украин дӥськутэн но кылъёсын тодматскон ортчоз. Азьланяз нуналъёс сӥземын луозы удмурт, ӟуч, бигер но азербайджан калыкъёслы. Ӵапак таӵе йӧслыко студентъёс дышетско техникумын.

Кыкетӥ этап – лекциос но мастер-классъёс. Студентъёс доры мерлыко огазеяськонъёслэн ёзчиоссы вуозы, вералозы калык сярысь, мерлыко огазеяськонлэн ужъёсыныз тодматозы. Кылсярысь ӟучъёс сярысь вералоз Ульяна Юрьевна Юдина, ӟуч лулчеберетъя огазеяськонлэн ёзчиез. Удмуртъёсын тодматыны ӧтемын Андрей Николаевич Прокопьев, Калыкъёслэн Эшъяськон юртсьтызы калыккуспо но финн-угор вачеужанъя ёзэтэн кивалтӥсь.

Куинетӥез этап – йӧскалык сиён-юонъёсын тодматскон. Нырысетӥ нунал сӥземын украин но удмурт сиёнъёслы, кыкетӥ нуналэ азербайджан но бигер сиёнъёсыты веръялозы, куинетӥ нуналэ борщен тодматскон радъяськоз.

Йылпумъяськоз ӵектос бадӟым «Квест» шудонэн. Студентъёс аудиториысь аудиторие ветлозы пӧртэм пумо заданиосты быдэсъяса. Шудонлэн огъя темаез – йӧскалык лулчеберетъёслэн аспӧртэмлыксы.