16-тӥ оштолэзе вордскем нуналзэ пусйиськомы Ашальчи Окилэсь (Лина Григорьевна Векшиналэсь) – нырысетӥ удмурт нылкышно кылбурчилэсь, син эмъясь врачлэсь, фронтовиклэсь! Талы сӥзьыса, «Удмурт нылкышно кенеш» но «Удмурт кенеш» огазеяськонъёс Можга ёросысь Бадӟым Уча черкогуртын «Ашальчи лыдӟонъёс» форум ортчытӥзы.
2024-тӥ ар Семьялэн ареныз юнматэмын, соин ик лыдӟонъёсын бадӟым саклык висъяськиз Ашальчи Окилы, солэн Айво Иви агаеныз кусып воземезлы.
Татын ик пусъемын вал Ашальчи Оки премилэн 2023-тӥ ар понна лауреатъёсыз. Та дано нимез басьтӥзы:
Ботникова Елена Аркадьевна – эмчи, Ижкарысь эм академиысь ӧнерчи, эм тодосъёсъя кандидат, «Удмурт Кенеш» огазеяськонлэн ёзчиез;
Кибардина Татьяна Михайловна – Удмурт кун университетлэн Можга филиалэзлэн кивалтӥсез, филологи тодосъёсъя кандидат, «Удмурт Кенеш» огазеяськонлэн ёзчиез.
Справка:
Ашальчи Оки – нырысетӥ удмурт нылкышно кылбурчилэн но гожъяськисьлэн кушемнимыз (1898-1973 гг.).
Акилина Григорьевна вордскиз УЭ-ысь Грак ёросысь Ускы (Кузебаево) гуртын 1898-тӥ арын. Тодон-валан люказ Карлыганысь Центральной школаын (1914-тӥ арын йылпумъяз), Казаньысь университетлэн рабфаказ (1921-тӥ аре йылпумъяз) но собере Казаньысь медициная факультетын дышетскиз (1927-тӥ аре йылпумъяз).
Ашальчи Окилэн нырысетӥ кылбуръёсыз но веросъёсыз 1918-тӥ арын потӥзы «Виль синь» но «Гудыри» удмурт газетъёсын. 1928-тӥ арын «Сюрес дурын» («У дороги») но «О чем поет вотячка» нырысетӥ бичетъёсыз печатласько.
1928-тӥ арысен син эмъясь врач луыса ужаз, Удмурт АССР-ысь сӥё-дано эмчи.
Быдӟым Атыкай ожын фронтовой хирург вал, данъетъёсын пусъемын. Ожтыл бере, 1946-тӥ аре коньывуонэ, со Алнаш ёрос эмъюртын врач луыса ужаз.11:52
