6-тӥ куартолэзе Калыкъёслэн Эшъяськон юртазы «Атыкай музъемлэн геройёсыз. Калыкъёслэн эшъяськонзы» («Герои Отечества. Дружба народов») Элькун вожвылъяськонлэсь йылпумъянъёссэ шараязы. Ужрад «Тодэ ваён открытка. Калыкъёслэн эшъяськонзы» («Открытка памяти. Дружба народов») (0+) акция улсын радъямын вал. Вожвылъяськонэ элькунысьтымы улӥсьёс пыриськизы. Со кык номинациосъя ортчиз: «Семья архивысь туспуктэмъёс» («Фотографии из семейного архива») но «Калыкъёслэн эшъяськонзы сярысь мадён» («История дружбы народов»). Оглом ужрадэ 250-лэсь трос ужъёс туспуктэмъёсын но пӧртэм калыкъёс куспын эшъяськон сярысь мадёнъёс вуылӥзы.

Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.

Оглом 200-лэсь трос открыткаос Россиысь почтаен келямын вал. Тросэз соос нимысьтыз ожгар операцие пыриськисьёслы но ӵыжы-выжыоссылы вуылозы. Кык открытка Беларусе но Грузие келямын.

«Калыкъёслэн эшъяськонзы сярысь мадён» («История дружбы народов») нимо номинациын вормизы: Мария Бабушкина, Дарья Михайлова, Варвара Перевозчикова, Ольга Гребенкина, Елена Кайсина, Лидия Ионова, Егор Уржумцев, Ралина Шаехова, Никита Быданов, Лилия Минемуллина.

Нош «Семья архивысь туспуктэмъёс» («Фотографии из семейного архива») нимо номинациын кузьым басьтӥзы: Марина Кузнецова, Элина Плотникова, Вероника Пономарева, Ярослав Михайлов, Татьяна Николаева, Наталья Кузнецова, Сергей Виноградов, Елена Русских, Елена Лебедева, Мария Леонтьева.

Дипломъёсты но кузьымъёсты сётӥзы УЭ-ысь йӧскалык политикая министр Эдуард Петров, Калыкъёслэн Эшъяськон юртсылэн но УЭ-ысь Мер палаталэн кивалтӥсез Юлия Шахтина, УЭ-ысь печатья но калыке ивортодэт вӧлмытонъя агентстволэн кивалтӥсез Александр Валов, Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Ураськин.

Озьы ик ужрадэ люкаськемъёс «Калыкъёслэн эшъяськонзы – Вормонлэн кужымез!» («Дружба народов – сила Победы!») (0+) ӝӧквыл шудонэн но «улӟем» туспуктэмъёсын адӟытонэн тодматскизы. Тунсыко программаын вал на мастер-классъёс, вузаськон азбар, концерт но Вормон вальс.