Быдӟым Атыкай ожын вормонын Совето Союзысь калыкъёслэн эшъяськонзы, ӵошен нюръяськонзы бадӟым инты басьтӥз. Туннэ нуналэ но сыӵе калыккуспо эшъяськонэн пумиськиськод ке, сюлэм шумпотонэн тырме. Озьы, 27-тӥ оштолэзе Якшур-Бӧдьяысь шаертодонъя музейын Быдӟым Атыкай ожын вормонлы 70 ар тырмонлы сӥзем адӟытон усьтӥськиз. Татын ик радъямын вал ветеранъёсын пумиськон но. Таӵе ужрадлэн кичӧлтӥсьёсыз луизы азербайджанъёслэн «Достлуг» мерлыко центрысьтызы ёзчиос. Люкаськем ветеранъёсты ӟечкылазы центрлэн кивалтӥсез Зульфигар Рагим оглы Мирзаев, «Якшур-Бӧдья ёрос» муниципал кылдытэтлэн тӧроез В.Г. Ефремов, ёросысь ветеранъёслэн кивалтӥсьсы Зоя Шуклина, Удмурт Элькунысь йӧскалык политикая министерствоысь ӧнерчи Александр Скобелев. Куноослы концерт номеръёс возьматӥзы кадет классысь дышетскисьёс. Со сяна люкаськем калыкез азербайджан калык сиёнэн-юонэн куно каризы.