«Калыкъёсмы трос, нош кунмы одӥг!» – таӵе лозунген тямысетӥез югдытон калыккуспо акция ортчоз. «Бадӟым этнографической диктант» – со ӵектос, кудӥз тодматэ асьмеды Россиысь пӧртэм калыкъёслэн лулчеберетэнызы, озьы ик этнокультура сярысь тодон-валанъёсмес дунъя. Та проект 2017-тӥ арысен кутскиз, 367 сюрс адями соку пыриськиз отчы. Арлы быдэ пыриськисьёслэн лыдзы будэ – кылем арын диктантэз 4 076 000 адями гожтӥз.

2023-тӥ арлэсь юанъёссэ 3-тӥ шуркынмонэ поттозы Бадӟым этнографической диктантлэн вотэсбамаз www.miretno.ru . Диктантэз гожтыны луэ 3-8-тӥ шуркынмонэ.

Диктант 30 юанлэсь кылдытэмын, тест амалэн ортче. Солэн пуштросэз:

– 20 юан – юыдэс Россия понна огкадесь юанъёс;

– 10 юан – Россиысь котькуд улосвыллэн аслаз юанъёсыз.

Оглом 100 балл люканы луэ.

Ужез быдэстыны 45 минут сётӥське.

Пыриськисьёслы, кудъёсыз диктантэз электрон амалэн быдэстозы, йылпумъянъёсын сертификатъёс соку ик дасямын луозы.

Таяз аре но пыриськисьёс юанъёслэсь шонер валэктонзэ соку ик тодыны быгато, исторической справкаос сётэмын луозы ошмессинъёс вылэ ссылкаосын.