Удмуртиын, Россиын но быдэс дунне вылын 1-8-тӥ шуркынмонэ адямиос тодон-валанзэс эскеризы – укмысэтӥ калыккуспо акцие пыриськизы.

Туэ 3,5 миллионлэсь трос адями юанъёслы валэктонъёс сётӥз 170 кунъёсысь. Акцие Россия Федерациысь вань 89 улосвыл пыриськиз. Диктантэз быгато вал гожтыны соос но, кудъёсыз ӟуч, англи яке испан кылъёсты тодо.

Удмурт Элькунын акцие пыриськиз 33 сюрслэсь трос адями, соос пӧлысь 25 сюрсэз – онлайн амалэн, 8 сюрсэз – радъям интыосын.

Удмуртиын 212 площадкаос дасямын вал, соос пӧлысь 17-ез – Ижкарын. Элькунамы валтӥсь площадка луиз Удмуртилэн Кун Кенешез, кудӥз вуоно арын южтолэзе 30 арзэ пусъёз.

Диктант 30 юанлэсь кылдытэмын, тест амалэн ортче: 20 юан – быдэс Россия понна огкадесь юанъёс, 10 юан – Россиысь котькуд улосвыллэн аслаз юанъёсыз.

Озьыен, Удмуртиын улӥсьёс «Защитники Брестской крепости» суредэз гожтэм Киясаысь суредасья валэктон сётӥзы, Удмуртиын улӥсь финн-угор калыкез, кудӥз 2020-тӥ арын гожъян-чотанъя 5983 адями кылдытэ, но 5-тӥ инты соос пӧлысь басьтӥсез тодыны дэмлазы, озьы ик удмурт калык мадиськонлы валэктон сётоно вал – Укнотэк но, ӧстэк но — нош семьяез бадӟым (Ни окон, ни дверей-а семья большая).

Юанъёсты кылдытонэ мылкыд карисьёс пыриськизы, тазьы туэ гинэ нырысьсэ луиз. Удмуртия сярысь юанъёсты Богдан Анфиногенов дасяз.

Сетификатэз ӵектослэн нимлыко вотэсбамысьтыз басьтыны луоз https://miretno.ru

Эшшо огпол пусъём, ӵектос Удмуртиын кылдытэмын – «Ассамблея народов Удмуртии» мерлыко огазеяськон но УЭ-ысь Йӧскалык политикая министерство кичӧлтэм улсын. Собере акция, Россие сяна, кунсьӧре но паськыт вӧлмиз. Йӧскалык ужъёсъя Федерал агенство ӵектослы бадӟым юрттэт сётӥз, со ик акцилэн валтӥсь радъясез луэ.