Туэ диктант 6-тӥ оштолэзе очной но заочной амалъёсын ортчиз но Семьялэн Арезлы сӥземын вал. Диктантлы текст дасяз гожъясьчи, «Удмурт дунне» газетлэн валтӥсь редакторез но «Удмурт нылкышно кенеш» огазеяськонлэн кивалтӥсез Елена Миннигараева.

Огдышемъя текстэз «Мынам Удмуртие» радиоын но «Удмуртия» телеканалын лыдӟизы. Диктантэз 13-тӥ ползэ 167 площадкаосын гожъязы УЭ-лэн 5 каръёсаз но 23 ёросъёсаз. Со сяна акцие пыриськизы Башкортостан, Татарстан элькунъёс, Пермь но Киров улосвылъёс, Москва кар.

3028 адями ужрадэ пыриськизв;
2297 адямиос нимысьтыз площадкаосын гожъязы;
731 онлайн амалэн радио но телевизор пыр;
10 мурт тунсыкъяськыса гинэ гожтӥз, баллъёс сярысь малпатэк
75 адями диктантэз одӥг янгыштэк но гожтыны – 100 бал люканы – быгатӥз!

«Бадӟым удмурт диктант» гожтӥсьёс пӧлын Яр ёросысь Туканпи гуртысь 7 аресъем Семен Дементьев тужгес но пичиез луиз.
Тужгес но арлыдоез – Дэбес черкогуртысь Анна Ивановна Малых, солы 91 арес.
«Бадӟым удмурт диктант» улсын вотэсбамын Удмуртия сярысь тест дасямын вал. Сое 475 адями гожтӥз. Электрон сертификатэз басьтыны луоз диктантлэн вотэсбамаз «йылпумъянъёс» ватсэтын, асьтэлэсь нимтулдэс гожтэ.

Кин пыриськиз акцие, вералэ мылкыддэс.