«Бадӟым удмурт диктант» (6+) арлы быдэ ортчись улосвылкуспо акция 12-тӥ оштолэзе радъяськиз. Туэ ужрад Атыкай музъемез утисьлэн арезлы сӥземын вал, озьы ик герӟаськемын на Быдӟым Вормонлы 80 ар тырмонэн.

Диктантлы текст дасяз УЭ-ысь Кун премилэн Лауреатэз, РФ-ысь Гожъясьчиослэн но Журналистъёслэн кенешъёслэн ёзчиез Владимир Михайлов.

Диктант сӥземын Можга ёросысь Совето Союзлэн Героез Пётр Бабкинлы. Удмурт Гастелло – озьы шуыло Петр Андреевичез, малы ке шуоно огаз ожмаськонын аслэсьтыз пуштытэм аслобетсэ тушмон пала келяз.

Удмуртиын но солэн палэназ Бадӟым удмурт диктантэз 14-тӥ ползэ гожтӥзы 196 площадкаосын. Огдышемъя текстэз «Мынам Удмуртие» радиоын но «Удмуртия» телеканалын лыдӟизы.

Диктант гожтыны мылкыд каризы элькунысьтымы 29 муниципал но кар округъёс, но озьы ик Башкортостанысь, Татарстанысь, Пермьысь, Кировысь, Марий Элысь, Санкт-Петербургысь но Москваысь улосчиос.

✅2912 адями — ужрадэ пыриськиз;

✅2280 адями нимысьтыз дасям площадкаосын гожтӥз;

✅632 адями телевидение но радио пыр гожтӥзы;

✅111 адями 100 баллы гожтӥзы!

Соос пӧлысь тужгес но егитэз вал Яр ёросысь Тункапи гуртысь 8 аресъем Семен Дементьев.

Кезысь Ираида Анатольевна Каракулова, 100 аресъем кышномурт тужгес но арлыдоез луиз.

Со сяна Быдӟым Атыкай ож аръёсы Удмуртилэн историезлы но кылызлы сӥзем тест ортчыны луонлык вал. Со нимысьтыз вотэсбамын пуктэмын вал https://www.udmdiktant.ru/test. Ужрадэ 658 адями адями пыриськиз.

Тестэз ортчем бере, нимысьтыз сертификат басьтыны луэ. Со понна https://www.udmdiktant.ru/dictresult вотэсбаме пыре, «йылпумъянъёс» («результаты») люкетэз шедьтэ, нимдэс но фамилидэс гожтэ.

Большой Удмуртский диктант www.udmdiktant.ru