«Звук Евразии» – Межэтнической журналистика гильдилэн россиякуспо крезьгур ӵектосэз, кудӥз лулчеберет кичӧлтонъёсъя Президентлэн фондэзлэн юрттэменыз радъяське.

«Туала этника» жанрен тунсыкчиослы та зэмос творческой лаборатория луэ. Вожвылъяськонлэн пумаз дунъясьёс, кудъёсыз пӧлы пыро тодмо фольклористъёс, крезьгурчиос, куара гожтонъя огазеяьконъёсысь ӧнерчиос, бырйизы быдэс Россиысь 8-сэ вормисьёсты.

Ӵектослэн одӥгез йылпумъясь ужрадэз – кырӟанъёсты студиын гожтон но нимысьтыз альбом кылдытон. Финалэ потӥзы Красноярск улосвылысь, Башкортостанысь, Карелиысь, Алтай Элькунысь, Москваысь но Удмуртиысь усточиос.

Бесермян крезьёсты шудӥсь Наталия Дзыгалы «Шудья-чудья» ӵектосэныз вормисе потыны шуд усиз. Наталиялэн малпамезъя, крезьлэн гурез йырысь но сюлмысь одӥг вакытэ ӵош потэ.

– Со – котьку но мылкыд, котьку но – импровизиация, малы ке шуоно мылкыд ноку но огкадь луыны уг быгаты.

Таӵе мылкыдзэ возьматыса, улосчимы ассэ яркытгес но узыргес возьматыны быгатӥз. Наталия Дзыга электрон крезьгур пыр вашкала удмурт но бесермян гуръёсты шудэ. Котькудӥз, кин огпол ке но кылзӥськиз та усто кышномуртэз, вераны быгатоз: крезьгур – со зэмос магия.