Котырес ӝӧлэн ужаз пыриськизы Удмуртиысь бигеръёслэн мерлыко огазеяськонъёссы, журналистъёс, дышетӥсьёс. Лыктэм калыкез пумитаса но ӟечкыласа вазиськизы Удмурт Элькунысь йӧскалык политикая министрлэн воштӥсез Л.Ю. Соковикова но Удмурт Элькунысь тодосъя но дышетонъя министерствоысь йӧскалык дышетонъя секторлэн кивалтӥсез В.Л. Корепанова. Соос пусйизы пумиськонлэсь валтӥсь меретъёссэ – йӧскалык дышетон удысысь шуг-секытъёсты шараян, соосты палэнтыны луонлыкъёсты утчан, бигер кылэз дышетон методикаен вошъяськон.

Удмурт Элькунысь бигеръёслэн йӧскалык лулчеберетъя улсвыл автономизылэн кивалтӥсез, «Янарыш» газетлэн редакторез Рамзия Ильдусовна Габбасова вераз бигер кылъя дышетӥсьёс уг тырмо шуыса. Кылсярысь, сыӵе югдур кылдэмын Вотка ёросын. Фнун Гавасович Мирзаянов, Удмурт Элькунысь бигеръёслэн мерлыко центрзылэн кивалтӥсез ивортӥз бигер кылэз арнянуналъёсы Калыкъёслэн Эшъяськон юртазы дышетон сярысь. Татарстан улосын бигер кылэз дышетонын выль технологиосты уже куто. Соосын тодматӥз Татарстан Элькунысь Йӧскалык дышетонъя кивалтоннилэн кивалтӥсез Лилия Марсовна Ахметзянова. Бигер кылэз дышетыны онлайн-школа «Ана теле»- лэсьтэмын. Татын кылэз котькин дунтэк дышетыны быгатэ.