23-тӥ южтолэзе Лулчеберетъя но устолыкъёсъя Алнаш черкогуртысь центрын бигер лулчеберетлы сӥзем нунал ортчиз. Таӵе ужрад орчытӥське арлы быдэ. Валтӥсь мугез солэн – Алнаш ёросын улӥсь бигеръёслэсь лулчеберетсэс, кылзэс утён но азинтон.
Ужрадэз дасязы: «Алнаш ёрос» муниципал кылдытэт администрации, Калыкъёслэн эшъяськон юртсы, «Алнаш ёрос» муниципал кылдытэт администрациысь лулчеберетъя, йӧскалык кусыпъёсъя но туризмъя кивалтонни, бигеръёслэн мерлыко огазеяськонзы, «Янарыш» газетлэн редакциез.
Залэ трос калык люкаськиз. Лыктэмъёсты Администрациысь лулчеберетъя кивалтоннилэн кивалтӥсез Н.В. Антонова ӟечкылаз. Ужрадэз ортчытыны быгатэмзылы шумпотэмзэс, тау кылъёссэсэс вераны сцена вылэ потӥзы Удмурт Элькунысь бигеръёслэн мерлыко огазеяськонзылэн кивалтӥсез Ф.Г. Мирзаянов но Удмурт Элькунысь бигеръёслэн автономизылэн кивалтӥсез Р.Г. Шарифуллин. Кырӟан-эктонъёссэс возьматӥзы Бигер Тоймобаш но Варзино-Алексеево гуртъёсысь коллективъёс.
Люкаськем калыклы бадӟым кузьым луиз Ижкарысь «Асылъяр» нылпи ансамбльлэн лыктэмез. Пиналъёс паймытӥзы калыкез асьсэлэн устолыкенызы. Менделеевск карысь Роберт Набиуллин аслаз кырӟанъёсыныз куноослэсь мылкыдзэс ӝутӥз.
Набережные Челны карысь книгапоттони нылпиослы книгаосын адӟытон радъяз. Мылкыд карисьёслэн луонлыксы вал та книгаосты басьтыны.
Ужрад пайдалыко, шуныт ортчиз. Та выллем ужрадъёс нош но нош возьмато калыкъёслэсь тупаса, ог-огзэс гажаса улэмзэс.