«Бадӟым этнографической диктант – со яркыт пример, кызьы улосвылын малпам ужрад бадӟым калыкуспо проектлы пӧрмыны быгатэ, – шуиз Кивалтэтлэн председателез Ярослав Семёнов. – Калыкъёслэн огазеяськон нуналзы азьын ортчись акция луонлык сётэ асьме странамылэсь калык лулчеберт пӧртэмлыксэ но солэсь дуно луэмзэ шӧдыны». Ачиз Ярослав Семёнов диктантэз www.miretno.ru вотэсбамын гожтӥз.

Удмуртиын ӵектослэн валтӥсь площадкаез Калыкъёслэн Эшъяськон юртсы луиз, отчы тестэз ортчыны 150 адями вуиз. Соос пӧлын вал йӧскалык-лулчеберет но религия удысъёсысь, казак огазеяськонъёсысь, министерствоосысь но ведомствоосысь ужасьёс, озьы ик депутатъёс, вылӥ дышетскон ужъюртъёсысь студентъёс но кадетъёс.

Пыриськисьёслы ӟечкылан кылэн вазиськиз РФ-ысь Кун Думалэн депутатэз Лариса Буранова: «Нырысетӥзэ диктантэз гожтӥмы 2016-тӥ арын, нош 2017-тӥ арын акцилы калыккуспо инлык (статус) сётӥзы. Акция кык ар ӵоже онлайн амалэн ортчиз ке но, пыриськисьёслэн лыдзы будэ».

УЭ-ысь Кун Кенешлэн Председателезлэн воштӥсез Иван Черезов озьы ик ужрадлэсь паськыт луэмзэ пусйиз: «Удмурт шаерын вордскем Этнодиктант аслаз вӧлмеменыз масштабеныз но кыскись кужыменыз выльысь но выльысь паймытэ. Котькуд ар тунсыкоесь но аспӧртэмлыкоесь площадкаос усьтӥсько. Этнодиктантэз котькытын гожто, космосын но».

Диктант калыктодосъя 30 юанлэсь пӧрмытэмын. Ортчон дырыз – 45 минут. Удмурт Элькунын 166 площадка регистрировать каремын. Диктантэз онлайн амалэн 8-тӥ шуркынмонозь www.miretno.ru вотэсбамын гожтыны луэ.

Тодэ вайытӥськом, диктант Калыкъёслэн огазеяськон нуналзылы сӥземын но Россиысь котькуд улосвылъёсын онлайн но офлайн амалэн ортче. Йылпумъянъёсты ялозы 12-тӥ толсуре Россия Федерацилэн Кункат нуналаз.