22-тӥ оштолэзе Пичи Пурга ёросысь Брангуртын ортчиз Ашальчи Окиез тодэ ваён ӝыт. Лулчеберет юртэ люкаськизы вань ёросъёсысь удмурт азьветлӥсьёс, Ашальчи Оки нимо премилэн лауреатъёсыз.

Вань удмуртъёслэн «Удмурт кенеш» огазеяськонзы котькуд ар удмурт лулчерет, дышетон, тодос удысын тыршись нылкышноосты Ашальчи Окилэн премиеныз пусъе. Та арын премиен данъямын Брангуртысь песяйёс но Алнаш музейысь öнерчи Мария Степановна Петрова.

М.С. Петроваез премиен пусйыны ӵектӥз «Удмурт кенеш» огазеяськонлэн Алнаш ёросысь ёзэтэз. Угось Мария Степановна трос аръёс ӵоже Ашальчи Окилэсь творчествозэ эскерон бордын тырше.

Брангуртысь песянайёслэсь коллективзэс пусйыны ӵектӥз Удмурт нылкышно кенеш. Быдэс дуннее тодмо песяйёс удмурт лулчеберетэз, кылэз азинтонын но вöлмытонын бадӟым уж нуо.

Куноослы возьматэмын вал Ашальчи окилэн улон но ужан сюресэз сярысь литературно-драматической композици, кудаз пыриськизы Любовь Тихонова, Галина Романова но Лидия Нянькина.

Люкаськем калыклы Брангуртысь лулчеберетъя юртын ужасьёс шулдыр но мур пуштросо «Мар сярысь кырӟа удмурт нылкышно» нимо концерт возьматӥзы.

Концерт учкон сяна куноослэн луонлыксы вал тодматскыны шаертодонъя музеен но нырысетӥ удмурт этнографлэн Григорий Верещагинлэн музееныз.