Вожвылъяськонэ ужъёсты сётыны луэ 2015-тӥ арын 20-тӥ гудырикошконысен 2016-тӥ арын 20-тӥ толшорозь. Ужрадэ пыриськыны быгато азьвыл нимаз книгаен поттымтэ удмурт кылын гожтэм ужъёс но дунтэк ужась Интернет вотэс бамъёсын удмурт кылын потэм ужъёс.

Вожвылъяськон ортче кык ӧръя (номинацияя).

«Бекче-бече, усьтӥськы!» ӧре кутӥсько 5-9 аресъем нылпиослы прозаен но кылбурен гожтэм ужъёс.

«Оло зэм, оло даур…» ӧре кутӥсько 10-16 аресъем нылпиослы прозаен фэнтези, фантастика, детектив но приключение жанрын гожтэм ужъёс.

Вожвылъяськонэ аслаз гожтэм уженыз (ужъёсыныз) ачиз автор (авторъёс) гинэ пыриськыны быгатэ. Вожвылъяськонэ пыриськыны быгато вань мылкыд карисьёс. Ужъёс кутӥсько электрон кабен гинэ. Гожтэм ужъёсты келяно www.minnаc.ru бамын сётэм нимысьтыз сётэм пусйиськон каб пыр Word форматэн (*.doc, *.docx, *rtf).

Ыстэм ужъёс поттэмын луозы www.minnac.ru вотэс бамын но эскериськозы жюриен, кудаз пыро «Удмуртия» книгапоттонниысь ӧнерчиос, гожъяськисьёс, журналистъёс, литература но кылтодон удысысь ӧнерчиос, дышетӥсьёс, лыдӟетъюртъёсысь ӧнерчиос.

«Быдӟым лыдӟет дауре» I элькун вожвылъяськон ортчытӥське Удмурт Элькунысь йӧскалык политикая министерстволэн кичӧлтэмезъя Удмурт Элькунысь «2013-2020-тӥ аръёсы йӧскалыкъёслэсь кусыпъёссэс юнматон но мерлыко улонзэс азинтон» кун программаез быдэстыса, нылпиослы удмурт кылын гожъяськисьёс пӧлысь выль нимъёсты шараян вылысь.

Тросгес тодыны луэ Вожвылъяськон сярысь Положениысь