«Атыкай музъемлэн геройёсыз. Калыкъёслэн эшъяськонзы» («Герои Отечества. Дружба народов») вожвылъяськонэ заявкаосты кутон йылпумъяськиз. Та ужрадэ 250-лэсь трос ужъёс туспуктэмъёсын но пӧртэм калыкъёс куспын эшъяськон сярысь мадёнъёс вуылӥзы. Та люкам арбериос вылын 1-15-тӥ оштолэзе дышетӥсьёс пиналъёслы суредаськонъя урокъёс нуозы. Вожвылъяськон «Тодэ ваён открытка. Калыкъёслэн эшъяськонзы» («Открытка памяти. Дружба народов») ӵектос улсын кылдытэмын. Со Быдӟым Вормонлы 80 ар тырмонэзлы но геройёсты тодэ ваёнлы сӥземын.

Вожвылъяськонэ Удмуртиысь йӧскалык-лулеберетъя огазеяськонъёсысь пиналъёс пыриськизы. Вылӥ верам люкам арбериос вылын дышетскисьёс чеберлыко кылдытос уж пӧрмытозы.

Пиналъёслэн суредъёссы почта открыткаослы но интызэ вошъясь адӟытонлы инъет луозы. Вормисьёсты сӥё-дано пусъёзы 6-тӥ куартолэзе Калыкъёслэн Эшъяськон юртазы «Тодэ ваён открытка. Калыкъёслэн эшъяськонзы» элькун акция улсын. Та нуналэ кылдытэм открыткаосты матысь адямиослы, эшъёслы, СВО-е пыриськисьёслы ыстыны луоз.

Элькунысьтымы улӥсьёслэн та ужрадэ пыриськемзы лулчеберетэз утёнлы но азинтонлы юрттэ, со «Семья» йӧскалык ӵектослэн азьмугъёсызлы тупа.