29-тӥ пӧсьтолэзе Шаркан ёросысь Зар-Вишур гуртын егитъёслэн быдэ вуэмзылы сӥзем «Эру» шулдыръяськон ортчоз.

Вераны кулэ, Зар-Вишуре егитъёс туэ кыкетӥзэ люкаськозы ини. 2015-тӥ арын Шаркан, Якшур-Бӧдья, Глаз, Сьӧлта, Эгра ёросъёсысь командаос эскеризы, кытысь егитъёс тужгес но чырткем, шаплы но быгатӥсь. Ужрадъясьёслэн верамзыя, туэ Шаркан пала элькунмылэн палэназ улӥсь удмуртъёслэн но командаоссы вуозы.

Егитъёс понна дасямын ӵошатсконъёс, кудъёсаз соослы кулэ луоз возьматыны чырткем, кужмо но «бадӟым улонын» улыны дась луэмзэс. Нимысьтыз радъям квест-шудонын эскерозы соослэсь удмурт лулчеберетэз но сям—йылолъёсты тодэмзэс.

Шулдыръяськонлы лирической мылкыд пыӵатоз егитъёс пӧлысь тужгес но яратӥсь парез быръёнъя «Кык дыдыкъёс» вожвылъяськон. Таӵе ним басьтон понна яратӥсьёслы куать эскеронъёс пыр потоно луоз. Кылсярысь, егит пиос пу пильылозы, нош нылъёс дась артаносты люкалозы. Озьы ик взьматыны кулэ луоз пыжен уяны, карнанэн ву нуллыны быгатэмзэс.

Командаос понна эшшо одӥгез вожвылъяськон – сиён-юон дасян. Жюрилы, но куноослы егитъёс возьматозы удмурт сиён-юонъёсты пӧраны быгатэмзэс.

Йылпумъяськоз шулдыръяськон тужгес но зол командаосты но «кык дыдыкъёсты» дипломен но дуно кузьымъёсын пусъёнэн.

Пыр-поч ивортодэт басьтыны луэ таӵе телефонъя: 8904837143 – “Шунды” мерлыко огазеяськонлэн кивалтӥсез О.А. Тронина.