28-тӥ пӧсьтолэзе Шаркан ёросын Зар-Вишур гуртын быдэ вуонлы сӥзем «ЭРУ» ужрад ортчиз. Валтӥсь меретэз «ЭРУ-лэн» – удмурт калыклэсь вашкала сям-йылолъёссэ улӟытон но соосты туала улонэ пыӵатон.

Егитъёсты ӟечкыланы вуизы «Зар-Вишур» муниципал кылдытэтлэн Тӧроез Елена Широбокова, «Удмурт Кенеш» ассоциацилэн президентэз Татьяна Ишматова, удмурт егитъёслэн «Шунды» мерлыко огазеяськозылэн кивалтӥсез Алина Чернова, Удмурт Элькунысь йӧскалык политикая министерствоысь ӧнерчи Алена Наговицына, Калыкъёслэн Эшъяськон юртсылэн кивалтӥсезлэн воштӥсез Раиса Солоненко.

Удмуртиысь, Татарстанысь но Финляндиысь командаос пӧртэм ӵошатсконъёсын асьсэды возьматӥзы-эскеризы. Ужрадлэн программаяз вал тодматскон, квест-шудон, ӟусэз-скамьяез буянъя «Ми татын вал» арт-проект. Учкисьёслы тужгес но яраз «Кык дыдыкъёс» конкурс, татын тужгес усто кузъёсты бырйизы.

Егитъёс возьматӥзы удмурт калыклэсь сям-йылолъёссэ тодэмзэс, пӧртэм ужъёсты лэсьтыны быгатэмзэс, “бадӟым” улонын ас понназы улыны дась луэмзэс.