3-тӥ куарусёнэ терроризмен нюръяськон нуналэ Быдэс Россиысь «Капля жизни» акция радъяськоз.

Со 2004-тӥ аре Беслан карын шимес югдур ортчемлы вадьсатэмын. Соку 1-тӥ куарусёнэ террористъёс киултӥзы Уйпал Осетилэн Беслан карысьтыз 1-тӥ номеро школаез, дышетскон арез усьтон линейка ортчем бере. Та террористической акт дыръя сюэн адямиос быризы, соос пӧлысь тросэз – нылпиос. Шимучыр вакытэ 3 нунал ӵоже пленэ сюрем адямиос одӥг ву шапык но юыны ӧз быгатэ вал.

Та нуналэз буре вайыса, егитъёслэн йӧскалык-лулчеберетъя «Вместе» мерлык огазеяськонлэн кичӧлтэмезъя но УЭ-ысь йӧскалык политикая министерстволэн юрттэмезъя «Капля жизни» акция малпамын вал, кудӥз котькуд ар ортче.

Акцилэн ужпумез – егитъёс пӧлын терроризмлы но экстремизмлы пумит нюръяськонъя ӟеч граждан позиция юнматон; ужрадэ пыриськисьёсты сак но кылкутӥсь луыны курон.

Акцие пыриськисьёслы, кырымпыдэсъёсазы ву басьтыса, буре вайыса мемориал, Вормон скверъёс, дышетон ужъюртъёс, микрорайонъёс котырын будӥсь сяськаосты кисьтаны дэмласьком. Озьы вуэз сётыны луэ соослы, кин ӧвӧл ни.

Ужрадэ онлайн амалэн но пыриськыны луэ: юртады будӥсь турын-куаръёсты, сяськаосты кырымысь вуэн утялтэлэ, мерлык вотэсэ #капляжизни#этонеиграАнтитеррор хештегъёсын туспуктэм яке видео понэлэ.

Вань ужрадъёс вотэсын #капляжизни, #этонеиграАнтитеррор хештэгъёсын но интыпуслэсь теген пусйисько.

30-тӥ гудырикошконозь заявка кельтэ но асьтэлэн улон интыяды акциез радъялэ.

Ижкарын акция пиналъёслэн но егитъёслэн творчествозыя Дворецлэн сквераз 3-тӥ куарусёнэ 11:00 часын ортчоз (Милиционной но Киров урамъёслэн герӟаськон вадесаз).