Нылпиослы удмурт кылын гожъяськисьёс пӧлын «Быдӟым лыдӟет дауре» I элькун вожвылъяськонэ ужъёсты кутон дыр йылпумъяськиз. Та дыр куспын огъя 42 уж вуэмын.

Вожвылъяськон ортчиз кык ӧръя (номинацияя).

«Бекче-бече, усьтӥськы!» ӧр – 26 уж.

«Оло зэм, оло даур…» ӧр – 16 уж.

Тросэз авторъёс али гинэ кутско ай гожъяськны, но тодмо авторъёс но мылкыд каризы пыриськыны ужрадэ. Кылсярысь, Ульфат Бадретдинов, Алексей Ельцов, Владимир Котков, Лия Малых, Елена Панфилова но мукетъёс.

Али ужъёсты эскере жюри, кудаз пыро «Удмуртия» книгапоттонниысь ӧнерчиос, гожъяськисьёс, журналистъёс, литература но кылтодон удысысь ӧнерчиос, дышетӥсьёс, лыдӟетъюртъёсысь ӧнерчиос

25-тӥ южтолэзьысен 19-тӥ оштолэзёзь Удмурт Элькунысь йӧскалык политикая министерстволэн вотэс бамаз лыдӟисьёслэн луонлыксы луоз ярам произведениоссы понна куаразэс сётыны. Тодады вайытиськом, Вотэс бамын куарасётонын вормисе потэмъёсты нимысьтыз коньдонэн пусъёмы:

«Бекче-бече, усьтӥськы!» ӧр – 10 сюрс манет.

«Оло зэм, оло даур…» ӧр – 17 сюрс манет.

Ваньдэсты ӧтиськомы лыдӟиськыны но кельшем ужъёстылы куарадэс сётыны. Жюрилэн куремезъя, зэмлыко куара сётон понна, авторъёслэн нимъёссы ватэмын. Вормисьёслэн нимъёссы шараямфн луозы лыдӟисьёслэн куара сётонзы йылпумъяськем бере.

«Быдӟым лыдӟет дауре» I элькун вожвылъяськон ортчытӥське Удмурт Элькунысь йӧскалык политикая министерстволэн кичӧлтэмезъя Удмурт Элькунысь «2013-2020-тӥ аръёсы йӧскалыкъёслэсь кусыпъёссэс юнматон но мерлыко улонзэс азинтон» кун программаез быдэстыса, нылпиослы удмурт кылын гожъяськисьёс пӧлысь выль нимъёсты шараян вылысь.