Удмурт егитъёслэн мерлыко «Шунды» огазеяськонзы Удмурт Элькунысь йӧскалык политикая министерствоен, Удмурт Элькунысь егитъёсын ужанъя министерствоен, Эшъяськон юртэн валче Быгатӥсь нылпиос понна «Шундыкар-2014» улосвылкуспо лагерь радъяло. Ужрад 9-19-тӥ гудырикошконэ «Ёлочка» лагерьын ортчоз.

Солэн валтӥсь ужпумез – удмурт нылпиослэсь быгатонлыкъёссэс шараян но соосты азинтон, дунневыл тенденциосты лыдэ басьтыса, конкурентноспособной муртъёсты будэтон, пиналъёслэсь пуш узырлыксэс паськытатон, анай кылзэс, выжыоссэс, сям-йылолъёссэс, лулчеберетсэс тодон пыр, азьланяз соослы юрттон.

«Шундыкар» – туж кулэ луись проект, кудӥз удмурт кылэз но лулчеберетэз вӧлмытыны юрттэ. Нылпиос удмурт киуж-ӧнеръёслы дышетско, фольклор материалэн ужало, туала удмурт творчествоен тодматско. «Шундыкар» лагерь 22 ар радъяське ини, со возьматэ аспӧртэмлыко творческой мастерскойёслэсь кулэлыксэ но пайдалыксэ, кудъёсыз элькунмылы но бускель улосвылъёслы национальной кадръёсты дасяло.

Лагерьын нылпиос пӧртэм ӧръёсъя ужалозы: суредаськон, литература, фольклор но эстрада, журналистика, проектирование, крезь лэсьтон, видеоискусство, дӥськут дизайн.

Озьы ик пӧртэм мастер-классъёс ортчытъяськозы (финн-угор шудонъёс но эктонъёс, дунне вылысь пӧртэм калыкъёслэн эктонъёссы, чебер лыдӟон, пантомима но мукет), творческой пумиськонъёс -гожъяськисьёсын, «чеберинаосын», йӧскалык шудонъёсын этнодискотекаос, спортивной ӵошатсконъёс, интеллектуальной но шулдыръяськон ужрадъёс.

Юанъёсты кылдӥзы ке, таӵе номеръя вазиськыны быгатӥськоды: (3412) 63-10-44, +7904 837 14 33, – Тронина Ольга Алексеевна, УМОО «Шунды» тӧро.