8-тӥ инвожое Шаркан ёросысь Быги гуртын, финн-угор дуннелэн лулчеберет шоркараз, гуртлэн нуналэзлы сӥзем калык шулдыръяськон ортчиз. Люкаськиз 500-лэсь ятыр адями.

Поселенинлэн тöроез Нина Григорьевна Беляева вера: «Гуртлэсь нуналзэ пусйыса, арлы быдэ шулдыръяськон ортчытӥськомы. Туэ нырысьсэ мукет улосъёсысь но кунъёсысь куноос ми дорын. Ми понна со бадӟым шумпотон!»

Шулдыръяськонэз усьтӥзы но калыкез ӟечкылазы «Шаркан ёрос» муниципал кылдытэтлэн тöроез А.А. Прохоров, Удмурт Элькунысь йöскалык политикая министрлэн нырысетӥ воштӥсез П.А. Орлов, Россиысь калыкъёслэн ассамблеязылэн тӧроез С.К. Смирнова, Финн-угор егитъёслэн ассоциацизылэн президентэз Сампса Холопайнен.

Быги гуртысь коллектив куноосты кырӟан-эктонъёсын шулдыртӥз, нылпиос понна ужазы атракционъёс, спортэн тунсыкъяськисьёс футболэн но волейболэн шудӥзы, гуртысь но ёросысь кибашлыослэн ужъёсынызы вузкарон но радъямын вал.