26-тӥ инвожое Перм улосысь Куеда ёросысь Бадӟым Гондыр гуртын фольклоръя «Чакара» улосвылкуспо фестиваль ортчоз.

Нялтас вераса, туэ ужрад 7-тӥ ползэ радъяське ини. Фестиваль ортчытӥське Камсьӧр удмуртъёслэн йӧскалык центрзылэн кичӧлтонэзъя Удмурт Элькунысь йӧскалык политикая министрестволэн но Удмурт Элькунысь Кун Кенешлэн юрттэменыз. 2015-тӥ арысен фестивальлэн радъяськон интыез вошъяське. Кылем арын пӧртэм улосъёсысь удмуртъёс Башкириысь Калтасы ёросэ люкаськылӥзы, туэ куноосты Перм улосысь Куеда ёросысь Бадӟым Гондыр гуртын витё.

Фестивальлэн валтӥсь ужпумъёсыз – удмурт калыклэсь кырӟанъёссэ, сям-йылолъёссэ утён, Россилэн пӧртэм улосъёсаз улӥсь удмуртъёслэсь Удмурт Элькунэн кусыпъёссэс юнматон.

Туэ Перм улосысь удмуртъёс доры Удмуртиысь, Башкортостанысь, Татарстанысь, Марий-Элысь, Свердловск, Томск улосъёсысь, Эстониысь, Санкт-Петербургысь но Мускоысь фольклор ансамбльёс вуозы.

Вераны кулэ на, та нуналэ куноослэн луонлыксы вань Элен вӧсе пыриськын. Вӧсяськон ортчоз Бадӟым Гондырлэсь 8 километрлы огпалан, Кирга гуртын.