17-18-тӥ южтолэзе Чебеоксарыын ичи лыдъем калыкъёслы кун юрттэт сётонлы сӥзем VI лулчеберет форум ортчоз. Ужрад, кудзэ радъя Россиысь лулчеберетъя министерство, ичи лыдъем калыкъёсты огазея, лулчеберетсэс утьыны юрттэ.

Чуваш Элькунлэн шоркараз Приволжской федерал округлэн вань улосъёсысьтыз делегациос вуозы. Форум кыстӥськоз кык нунал. Радъямын луозы: научно-практической конференция, мастер-классъёс, котырес ӝӧкъёс, кибалшыослэн киужъёсынызы адӟытон, калык быгатонлыкъёсъя йӧскалык центръёслэн фестивальзы. Йылпумъяськоз ужрад Крымен Россилэн огазеяськемзылы сӥзем митинген.

Азьло аръёсы таӵе форум ортчиз ини Грозныйын, Хабаровскын, Читаын, Элистаын но Уфаын. Удмурт Элькунысь та ужрадэ пыриськоз Удмурт Элькунысь йӧскалык политикая министр Лариса Николаевна Буранова.

Туспуктэм: www.eao.ru